काठमाडौँ । समस्याग्रस्त सहकारी व्यवस्थापन समितिले सहकारीका ठूला ऋणीबाट कर्जा असुल गरी साना बचतकर्तालाई रकम फिर्ता गर्ने तयारी गरेको छ । समितिले पत्रकार सम्मेलन गर्दै जेठको पहिलो साताबाट बचत फिर्ता गर्ने तयारी गरेको जानकारी दिएको हो । 

समितिका अनुसार देशभरका समस्याग्रस्त सहकारी संस्थाका करिब ७६ हजार बचतकर्ताको करिव ४६ अर्ब रुपैयाँ फिर्ता गर्न बाँकी रहेको छ । 

समितिले बचत फिर्ता र कर्जा असुली दुवै कार्यलाई एकसाथ अगाडी बढाएको अध्यक्ष डिल्लीराज आचार्यले जानकारी दिएका छन् । आचार्यका अनुसार सबै बचतकर्ताले समानुपातिक रूपमा रकम फिर्ता पाउनेछन् । बचतकर्ताहरुको पहिलो चरणमा बचतको कम्तिमा ५० प्रतिशत बचत फिर्ता गर्नेगरी समितिले कर्जा असुलीको काम गरिरहेको उनको भनाई छ ।

समितिले कर्जा असुलीमा ठूला ऋणीलाई प्राथमिकतामा राखेको छ । नवगठित समितिको ११ दिनको अवधिमा ४० जनाबाट ७३ लाख रुपैयाँ कर्जा असुली गरेको उनले जानकारी दिएका छन् । त्यस्तै, ९ लाख रुपैयाँ बचत मिलान गरिएको छ । कर्जा असुली बिना बचत फिर्ता सम्भव नभएकोले कर्जा असुलीका लागी समितिले सरकार, नेपाल प्रहरी सबैको सहयोग लिने आचार्यले जानकारी दिएका छन् ।

आचार्यका अनुसार पहिलो चरणमा कर्जा नतिर्नेहरुको नाम सार्वजानिक गरिनेछ । नाम सार्वजानिक भएपछि पनि सम्पर्कमा नआउनेहरुलाई पक्राउ गरी कर्जा असुली प्रक्रिया थालिने उनले बताएका छन् । 

हाल समितिसँग करिब ६० करोड रुपैयाँ मौज्दात रहेको छ भने यसमा सरकारले विनियोजन गरेको २५ करोड रुपैयाँ चक्रीय कोष पनि समावेश छ । समितिले उक्त २५ करोडलाई अत्यावश्यक अवस्थामा मात्र सापटीका रूपमा प्रयोग गर्ने र समितिले असुली गरेको ३५ करोड रुपैयाँबाट बचत फिर्ता सुरु गर्ने उनले जानकारी दिएका छन् । उनका अनुसार समितिले खर्च र भुक्तानीका लागि छुट्टाछुट्टै खाता सञ्चालन गर्नेछ ।