काठमाडौँ । नेपाल इन्भेष्टमेन्ट मेगा बैंक (एनआईएमबि) का कर्मचारी कारागार चलान भएका छन् । ग्राहकको रकम आफ्नो खातामा ट्रान्सफर गरेर घोटाला गरेको कसुरमा पक्राउ परेका बैंकको तौलिहवा शाखाका कर्मचारी रिसभ कार्की कारागार चलान भएका हुन् ।

पक्राउ परेका कार्कीसँग उच्च अदालत तुलसीपुर बुटवल इजलासका न्यायाधीशहरु रमेश ढकाल र चन्द्रमणि ज्ञवालीको इजलासले ५० लाख धरौटी माग गरेको थियो । तर, अदालतले माग गरेको अनुसारको धरौटी बुझाउन नसकेपछि उनलाई कारागार चलान गरिएको प्रहरीले जनाएको छ ।

उनीमाथि ग्राहकको मोबाइल बैंकिङ ट्रान्जेक्सन अलर्ट समेत नहुनेगरी मोबाइल बैंकिङ तथा कनेक्ट आईपीएसबाट १ करोड ६५ लाख रुपैयाँ ट्रान्सफर गरेर चोरी गरेको आरोप छ ।

गत चैत महिनाको पहिलो सातामै पक्राउ परेका कार्कीमाथि प्रहरीले ढेड महिना भन्दा लामो समय अनुसन्धान गरेको थियो । अनुसन्धान सकेर उनलाई अदालतमा पेश गरिएको थियो । सोही क्रममा अदालतले माग गरे बराबर धरौटी तिर्न नसकेपछि हाल उनलाई कारागार चलान गरिएको छ ।