काठमाडौँ । भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलले सहकारीका बचतकर्ताको पैसा फिर्ता गर्न राज्यकोषको पैसा खर्च नभएको प्रष्ट पारेकी छिन् । 

पछिल्लो तीन महिनामा ८ वटा समस्याग्रस्त सहकारीका १ हजार ४ सय ५२ साना बचतकर्ताको ५९ लाख ४ हजार ६ सय रुपैयाँ फिर्ता गरिएको जानकारी दिँदै मन्त्री रावले सो पैसा फिर्ता गर्न राज्य कोषको एक पैसा पनि खर्च नभएको प्रष्ट पारेकी हुन् । 

मन्त्री रावलले बचतकर्तालाई फिर्ता गरिएको रकम सम्बन्धित सहकारीका सञ्चालक तथा पदाधिकारीहरुको सम्पत्ति र बैंक खाता रोक्का गरी व्यवस्थापन गरिएको बताएकी छिन् । 

उक्त अवधिमा ३ करोड ५४ लाख ४९ हजार रुपैयाँ ऋण असुली भएको र आगामी दिनमा सहकारीहरूको प्रभावकारी अनुगमन गरिने मन्त्री रावलले बताएकी छिन् । त्यस्तै, निजामती कर्मचारीको उमेर हद र सेवाका सर्तसम्बन्धी ‘संघीय निजामती सेवा विधेयक’ हाल कानुन, न्याय तथा संसदीय मामिला मन्त्रालयमा रायका लागि पठाइएको र संसद्मा पेस भएपछि यसबारे टुंगो लाग्ने पनि जानकारी दिएकी छिन् ।