काठमाडौँ । दशैँमा गाडी भाडा नबढ्ने भएको छ । पेट्रोलियम पदार्थको मूल्य नबढे दशैँ तिहारमा सार्वजनिक यातायातको भाडा पनि नबढ्ने नेपाल यातायात व्यवसायी राष्ट्रिय महासंघले जनाएको छ । 

चाडपर्वलाई लक्षित गर्दै यातायात व्यवस्था विभागले आयोजना गरेको छलफलमा बोल्दै महासंघका अध्यक्ष पुण्यप्रसाद सिटौलाले सरकारले पेट्रोलियम पदार्थको मूल्य वृद्धि नगरे यातायातको भाडा पनि नबढाइने बताएका छन् ।

अन्तराष्ट्रिय बजारमा पेट्रोलियम पदार्थको मूल्य बढे पनि चाडपर्वको मुखमा सरकारले मूल्य बढाउन नहुने सिटौलाले बताएका छन् । 

उनले पेट्रोलियम पदार्थको मूल्य यथावत् रहे चाडपर्वमा सार्वजनिक यातायातको मूल्य पनि यथावत् राख्ने प्रतिवद्धता व्यक्त गरेका छन् । त्यस्तै, उनले चाडपर्वमा यात्रा गर्ने यात्रुलाई आधिकारिक काउन्टरबाट मात्र टिकट काट्न पनि आग्रह गरेका छन् ।