काठमाडौँ । प्रभु बैंकका प्रमुख कार्यकारी अधिकृत (सिइओ) सुमन शर्मा बैंकमा फोर्स लिभको इमेल लेख्न लगाएर आफू पर्सा हानिएको खुलासा भएको छ । एचआरलाई सिइओ १२ दिनका लागि फोर्स लिभमा छन् भन्ने इमेल लेख्न लगाएर शर्मा अदालत उपस्थित हुन पर्सा पुगेका हुन् ।

पर्सामा उनीविरुद्ध ठगी केसमा मुद्दा दर्ता भएको छ । मुद्धा दर्ता हुनुअघि उनीविरुद्ध पक्राउ पुर्जी जारी भएको थियो । पक्राउ पुर्जी जारी भए पनि उनी बैंकमा काम गर्दै आएका थिए । बुधबार फोर्स लिभ भन्दै पर्सा गएका उनी मंगलबार कार्यालयमै रहेको बैंकका सूचना अधिकारी रविन्द्र ढकालले बताए । कार्यालयमै रहेका उनलाई प्रहरीले किन पक्रिएन भन्ने प्रश्नसमेत उठेको छ । 

शर्मा तत्कालीन सनराइज बैंकमा हुँदा अञ्जली इन्टरनेशनललाई स्वीकृत भएको कर्जा रकम उपलब्ध नगराएको आरोपमा पर्सा जिल्ला अदालतमा ठगी तथा आपराधिक विश्वासघातसम्बन्धी मुद्दा दायर भएको हो । प्रभु कर्मचारी विनियमावली अनुसार फौजदारी केसमा दर्ता भएपछि उनी स्वत: निलम्बनमा पर्ने व्यवस्था छ । 

उनी पर्सामा अदालतमा हाजिर भएर सुटुक्क धरौटीमा रिहा हुने तयारीमा थिए। तर उनी फरार भएको सूचना बैंकका एक उच्च अधिकारीले चुहाएपछि यस विषयमा मिडियामा समाचार आएको थियो