• अर्थ सरोकार सम्बाददाता 

विराटनगर । नेपालमा थप दुई जना कोरोना संक्रमित डिस्चार्ज भएका छन् । विराटनगरको कोशी अस्पताल कोभिड १९ उपचार केन्द्रमा उपचार गराइरहेका थप दुई जना निको भएर डिस्चार्ज भएका हुन् । 

भोजपुरका २७ वर्षीय युवक १० वैशाखमा अस्पताल भर्ना भएका थिए भने झापा दमकका ६३ वर्षीय वृद्धलाई १२ वैशाखमा कोरोना देखिएपछि कोभिड १९ उपचार केन्द्रमा भर्ना भएका थिए । उनिहरु दुवै जना डिस्चार्ज भएका हुन् । रिपोर्ट नेगेटिभ आएपछि आइतबार दुई जनालाई डिस्चार्ज गरिएको कोशी अस्पताल कोभिड १९ उपचार केन्द्रका प्रमुख डाक्टर दीपक सिग्देलले जानकारी दिए । 

उनीहरुसँगै कोशी अस्पतालबाट डिस्चार्ज हुनेको संख्या १६ पुगेको छ । यसअघि बुधबार ६ र शुक्रबार ८ जना निको भएर डिस्चार्ज भएका थिए । संक्रमितको संख्या भने ११० पुगेको छ । शनिबार मात्रै ८ जना कोरोना संक्रमित फेला परेका थिए ।