">
- अर्थ सरोकार मल्टिमिडिया ब्यूरो
काठमाडौँ- संयुक्त राष्ट्र संघले नेपालको महिला सहयात्रा माइक्रोफाइनान्स वित्तीय संस्था लिमिटेडलाई एक लाख डलरसहित सम्मान गरेको छ । संयुक्त राष्ट्र संघीय महिलाहरुको अवस्थासम्बन्धी ६३ औं महासभामा महिलाहरुको सशक्तिकरणको क्षेत्रमा उल्लेखनीय योगदान दिएकोमा सो संस्थालाई एक लाख डलरसहित ‘राजकुमारी सविका विन्त अब्राहिम अल–खालिफा ग्लोबल अवार्ड’ द्वारा सम्मान गरेको हो ।
बिहीबार काठमाण्डौमा पत्रकार सम्मेलन गरी संस्थाले निजी क्षेत्रको तर्फबाट महिला सशक्तिकरणको क्षेत्रमा उल्लेखनीय योगदान दिएवापत आफ्नो संस्थालाई संयुक्त राष्ट्र संघले एक लाख डलरसहित सम्मान गरेको जानकारी दिएको छ । संस्थाकी प्रमुख कार्यकारी अधिकृत डा. सुमित्रा मानन्धरले गएकाे ३ वर्षयता महिला सशक्तिकरणको क्षेत्रमा विश्वमा निजी क्षेत्रहरुले खेल्दै आएको योगदानको मूल्यांकन गरेर आफ्नो संस्थाले सो पुरस्कार प्राप्त गरेको पनि जानकारी दिनुभयो ।
महिला सहयात्रा माइक्रोफाइनान्स वित्तीय संस्था लिमिटेडले नेपालको दुर्गम क्षेत्रमासमेत लघु उद्यम विकास कार्यक्रम सञ्चालन गरी महिलाहरुको सशक्तिकरणको क्षेत्रमा काम गर्दै आएको छ । प्रमुख कार्यकारी अधिकृत मानन्धरले ग्रामीण क्षेत्रका महिलाहरुमा उद्यम विकास र बजारीकरणसम्बन्धी आवश्यक ज्ञान तथा सीप र त्यसका लागि आवश्यक लगानीको समेत व्यवस्था गरेपछि संयुक्त राष्ट्र संघले आफ्नो संस्थालाई सम्मान गरेको पनि स्पष्ट पार्नुभयो । ९३ जना महिला र ४ वटा बैंक संस्थापक रहेको यस संस्थाले आफ्ना ग्राहक सदस्यहरुलाई सीप विकास र तालिम तथा बजारीकरणमा उदाहरणीय काम गर्दै आएको बताइएको छ ।
