पूर्वराजा ज्ञानेन्द्र शाहले राष्ट्रपति, प्रधानमन्त्री देखि दलका नेताहरुसँग आफ्नो सम्बन्ध सुधार गर्ने कोशिस गरेका छन । आज राजधानीको होटल सोल्टीमा भव्य भोजको आयोजना गरी उनले आफ्नो सम्बन्ध सुधार्न खोजेको राजनीतिक विश्लेषकहरुले विश्लेषण गरेका छन ।
छोरा–बुहारी (पूर्वयुवराज पारस र पूर्वयुवराज्ञी हिमानी)बाट जन्मिएका हृदयन्द्रको ब्रतबन्धको अवसरमा ज्ञानेन्द्रले आज उनले पाँचतारे होटल सोल्टीमा भव्य भोजको आयोजना गरेका हुन् । ज्ञानेन्द्रले हृदयन्द्रको ब्रतबन्धको एक सातापछि सो भोजको आयोजना गरेका हुन् । हृदयन्द्रको ब्रतबन्ध निर्मल निवासमा गत चैत १७ गते सीमित आफन्तका माझ सम्पन्न गरिएको थियो ।
भोजमा ज्ञानेन्द्रले राष्ट्रपति विद्यादेवि भण्डारी, उपराष्ट्रपति नन्दकिशोर पुन, प्रधानमन्त्री प्रचण्ड तथा उपप्रधानमन्त्री र मन्त्रीहरू, कूटनीतिक नियोगका प्रतिनिधिहरू, नेताहरू, धर्मगुरुहरू, उद्योग वाणिज्य महासङ्घ, च्याम्बर अफ कमर्स र सीएनआईका पदाधिकारी तथा सदस्यहरू लगायतलाई निम्ता गरेका छन् । सन्तमहन्थहरू, पत्रकारहरू, मिडिया व्यवसायीहरू, कलाकारहरू, संसद्मा प्रतिनिधित्व गर्ने र नगर्ने राजनीतिक दलका नेताहरू, सामाजिक कार्यकर्ताहरूलगायत समाजको सबै क्षेत्रका अगुवाहरूलाई समेत निमन्त्रणा गरिएको पूर्वराजा निकट स्रोतले बताएको छ ।
ज्ञानेन्द्रले राष्ट्रपतिदेखि विभिन्न दलका नेतासहितलाई नातीको ब्रतबन्धमा बोलाउनुलाई उनले सबैसँग सम्बन्ध विस्तारको उद्देश्य राखेको विश्लेषण गरिएको हो । – एस काठमाडौं
