काठमाडौं – मेची-महाकाली अभियानका क्रममा मधेसमा रहेका एमाले शीर्ष नेताहरु मंगलबार काठमाडौं फर्किने भएका छन् । सप्तरी घटनाका कारण ३ दिनका लागि अभियान स्थगित गरिएपछि अध्यक्ष केपी शर्मा ओली, वरिष्ठ नेता माधव कुमार नेपाल, महासचिव ईश्वर पोखरेललगायत नेताहरु राजधानी फर्किन लागेका हुन् ।

 नेताहरु मध्याह्न काठमाडौं आइपुग्ने एमाले महासचिव पोखरेलका स्वकीय सचिव दिपेन्द्र श्रेष्ठले जानकारी दिए। श्रेष्ठका अनुसार काठमाडौं आएर नै अभियानबारे थप रणनीति बनाउने नेताहरुको तयारी छ । साथै एमालेले सप्तरी घटनाबारे आफ्नो धारणा पनि मंगलबार नै सार्वजनिक गर्दैछ ।

दिउँसो ३ बजे पार्टी मुख्यालय धुम्बाराहीमा पत्रकार सम्मेलन आयोजना गरिएको एमालेले जनाएको छ । एमाले नेताहरु अभियानलाई निरन्तरता दिने पक्षमै रहेको स्रोतको दाबी छ । एमालेको मेची-महाकाली अभियान अन्तर्गत सोमबार सप्तरीमा भएको सभापछि मोर्चाका कार्यकर्ता र प्रहरीबीच झडप हुँदा ३ जनाको मृत्यु भएको थियो । अन्य केही गम्भीर घाइते छन् ।

 मोर्चाका कार्यकर्ताले एमाले सभामा सहभागीलाई लक्षित गरी ढुंगामुढा गर्न थालेपछि प्रहरीले गोली चलाएको थियो ।