काठमाण्डौ – धुर्मुस–सुन्तलीले गिरान्चौरमा एकिकृत बस्ती निर्माण सम्पन्न गरेर मुसहर बस्ती निर्माण गरिरहँदा अर्को हाँस्य कलाकार जोडी पनि प्रतिष्ठानको गठन गरि सामाजिक कार्यमा होमिएका छन् ।

हाँस्य टेलिभिजन श्रृङ्खला भद्रगोलबाट चर्चामा आएका कलाकार जोडी कुमार कट्टेल जीग्री र अर्जुन घिमिरे पाँडेले सप्तरीको गम्हरीया ४ का दृष्टिविहिन ३ परिवारका लागि घर बनाइदिने घोषणा गरेका छन् ।

उक्त जोडीले सामाजिक काम गर्नको लागि जीग्री पाँडे प्रतिष्ठानको स्थापना समेत गरेका छन् । सामाजिक कार्यको लागि उनिहरुले आफ्नो कमाइको ५ प्रतिशत र वार्षिक १० वटा कार्यक्रम समेत गर्ने भएको हो ।

सप्तरीका उक्त ३ परिवारमा १७ जना सदस्य रहेका छन् । उनीहरुलाई पाल्ने मुख्य व्यक्तिसहित ५ जना नै दृष्टिविहिन भएकोले दैनिक गुजरा चलाउन समेत समस्या रहेकाले सहयोग गर्न लागिएको उक्त प्रतिष्ठानले जनाएको छ ।

३० लाख रुपैँया अनुमानित लागतमा निर्माण हुने उक्त घर बालमैत्री, अपांगमैत्री र धुवाँरहित बनाइने जीग्री पाँडे प्रतिष्ठानले जनाएको छ ।उनिहरुले केहि दिन अघि मात्र दृष्टिविहिन परिवारका लागि लत्ताकपडा र खाद्यान्न वितरण गरेका थिए ।