एजेन्सी – भारतको राष्ट्रिय सूचना आयोगले दिल्ली विश्वविद्यालयलाई सन् १९७८ को बी।ए। डिग्रीको तथ्यांक सार्वजनिक गर्न निर्देशन दिएको छ । भारतका प्रधानमन्त्री नरेन्द्र मोदीले सोही वर्ष उक्त विश्वविद्यालयबाट बी।ए।को डिग्री हासिल गरेको बताइन्छ ।

सूचना आयुक्त श्रीधर आचार्युलुले दिल्ली विश्वविद्यालयको केन्द्रीय जनसम्पर्क अधिकृत मीनाक्षी सहायको दलीललाई पनि खारेज गरेका छन् । मीनाक्षीले त्यस्तो विवरण उपलब्ध गराउँदा तेस्रो व्यक्तिको नीजि जानकारी सार्वजनिक हुने भन्दै तथ्यांक दिन यसअघि अस्वीकार गरेकी थिइन् ।

सूचना आयोगले विश्वविद्यालयलाई त्यस्तो तथ्यांक निःशुल्क उपलब्ध गराउन पनि निर्देशन गरेको छ । आम आदमी पार्टीले मोदीको शैक्षिक योग्यताको प्रमाणपत्रमा प्रश्न उठाउँदै आएको छ । तर कुनै विवरण सार्वजनिक नगरे पनि दिल्ली विश्वविद्यालयले मोदीको प्रमाणपत्र सही भएको जनाएको थियो ।

विश्वविद्यालयले तथ्यांक सार्वजनिक गरेपछि मोदीको शैक्षिक प्रमाणपत्र सक्कली हो या नक्कली भन्ने छानविन गर्न सहज हुने अधिकारकर्मीहरुको भनाइ छ ।