काठमाडौं – सामुदायिक रेडियोहरुको छाता संस्था सामुदायिक रेडियो प्रशारक संघ अकोराबको नयाँ नेतृत्वका लागि दुईवटा प्यानलले प्रतिस्पर्धा गर्ने भएको छ। शुक्रबार काठमाडौंमा सुरु भएको अधिवेशनमा नेपाली कांग्रेस, नेकपा माओवादी केन्द्र, राप्रपा र मधेसी दल निकट सामुदायिक रेडियोकर्मीको एउटा प्यानल बनेको छ। 

त्यस्तै नेकपा एमाले र नयाँ शक्ति निकट रेडियोकर्मीको अर्को प्यानल बनेको छ। शुक्रबार बिहान प्रेस युनियन, प्रेस सेन्टर, मिडिया नेपाल र मधेसी पत्रकार समाज नेपालले गठबन्धन निर्माणको सहमति गरेका छन्।

  कांग्रेस, माओवादी सहितको प्यानलबाट रेडियो गोरखाका किशोरजंग थापा तथा एमाले र नयाँ शक्तिको प्यानलबाट रेडियो धादिङका सुवास खतिवडा उम्मेदवार बन्ने चर्चा छ। थापा अकोराबको वर्तमान कार्यसमितिमा वरिष्ठ उपाध्यक्ष छन् भने खतिवडा कोषाध्यक्ष छन्। 

अधिवेशनमा देशभरीका २ सय ८७ वटा सामुदायिक रेडियोका प्रतिनिधिले नयाँ नेतृत्व छनोट प्रक्रियामा भाग लिनेछन्। साधारण सभाको बन्द शत्र विहान सकिएको छ भने शुक्रबार नै नयाँ नेतृत्व चयन गर्ने कार्यक्रम छ।