काठमाण्डौ – ‘माननीय होसियार, जनताको अपेक्षा छ राष्ट्रघाती संविधान संशोधन विधेयक खारेज होस्’ मोवाइलमा टिनटिन म्यासेज आएपछि सांसद भरत साउद एक छिन त अक्क न बक्क परे ।

मोावाइलामा कसैले धम्की दिएको भन्दै उनी आत्तिए पनि । तर पुरै म्यासेजको अर्थ बुुझेपछि भने उनी म्यासेज हेर्दै मुसुुमुसु हाँसे । युवा विद्यार्थीहरुले सबै सांसदहरुको मोवाइलाईमा होसियारीको म्यासेज पठाएपछि आज सांसदहरुबीच त्यही गफको मेलो बनेको छ ।

संविधान संशोधन प्रस्तावको विपक्षमा रहेका युवा तथा विद्यार्थी संगठनले आज व्यवस्थापिका–संसद्का सदस्यलाई मोबाइल एसएमएसमार्फत सन्देश प्रवाह गरेका छन् ।

सो प्रस्ताव देश र जनताको हितमा नरहेकाले फिर्ता लिन सो प्रक्रिया अवलम्बन गरिएको हो । उनीहरुले ‘माननीय होसियार, जनताको अपेक्षा छ राष्ट्रघाती संविधान संशोधन विधेयक खारेज होस्’ भनी मोबाइलमा सन्देश लेखेर प्रवाह गरेका छन् ।

संसदमा प्रतिनिधित्व गर्ने विभिन्न दल तथा स्वतन्त्र सांसदले सो प्रक्रियालाई फिर्ता लिन तथा असफल बनाउन सक्ने निर्णायक भूमिका हुने हुँदा सन्देश प्रवाह गरिएको अनेरास्ववियुका सचिव आरसी लामिछानेले जानकारी दिए ।

नेकपा एमाले, नेकपा माले, राष्ट्रिय जनमोर्चा, नेपाल मजदुर किसान पार्टीलगायतका युवा तथा विद्यार्थी सङ्गठनका नेताले दबाब सिर्जना गर्न यस्तो अभियान सुरु गरेका हुन् । युवा तथा विद्यार्थीका सङ्गठनले अघिल्लो दिन संयुक्त बैठक बसी नयाँ चरणको दबाबका कार्यक्रम ल्याएका थिए । सोही कार्यक्रमअन्तर्गत आज सन्देश प्रवाह गरिएको छ ।