काठमाडौँ – भारतीय राजदूत रणजीत रायलाई देश निकाला गर्न परेको उजुरीमा हेलो सरकारले आवश्यक कारबाही प्रक्रिया अघि बढाएको छ ।

पत्रकार घमराज लुइटेलले हेलो सरकारमा दर्ता गराएको सो मागका सम्बन्धमा आइतबार हेलो सरकार डेस्कले परराष्ट्र मन्त्रालयलाई पत्र लेखेर कारबाही प्रक्रिया अघि बढाउन भनेको हो ।

पत्रकार लुइटेलले रायका पछिल्ला गतिबिधि कुटनीतिक मर्यादा विपरित भएको भन्दै ट्वीटरमार्फत देश निकाला गर्नुपर्ने मागसहितको उजुरी हेलो सरकारमा हालेका थिए ।

हेलो सरकार स्रोतका अनुसार ४४१०४ चलानी नम्बर भएको पत्रमार्फत उसले लुइटेलको उजुरीमाथि आवश्यक प्रक्रिया अघि बढाउन परराष्ट्रलाई आग्रह गरेको हो ।

नेपालको राजनीतिले जटिल मोड लिएको समयमा राजदूत रायको सक्रियता बढ्ने गर्छ । जसका कारण पटक–पटक उनको आलोचनासमेत हुने गरेको छ । यसैसन्दर्भमा पछिल्लोपटक सरकारले दर्ता गरेको संविधान संशोधन विद्येयमाथि उनको चासो हुनु र मधेस केन्द्रीत दललाई दूतावास भवन बोलाएर निर्देशन दिएको खबरले चर्चा बटुलेको छ ।

यस्तोमा लुइटेलले रायले नेपालको आन्तरिक मामिलामा हस्तक्षेप गरि कुटनीतिक मर्यादाको उल्लंघन गरको आरोपसहित उजुरी हालेका थिए । जुमा लेखिएको छ, ‘हेलो सरकार, कुटनीतिक मर्यादाविपरित नेपालको आन्तरिक मामिलामा हस्तक्षेप गरी भाँडेकोले भारतीय राजदूत रायलाई देश निकाला गरियोस् ।’