काठमाडौँ – सरकार र तत्कालीन विद्रोही नेकपा माओवादीबीच विस्तृत शान्ति सम्झौता भएको आज १० वर्ष पूरा भएको छ ।

शान्ति सम्झौताको १० वर्ष बित्दासमेत सम्झौताका कतिपय प्रावधान अझै कार्यान्यवन भएका छैनन् । ५ मंसिर २०६३ मा भएको शान्ति सम्झौतामा सरकारका तर्फबाट तत्कालिन प्रधानमन्त्री स्वर्गीय गिरिजाप्रसाद कोइराला र विद्रोहीका तर्फबाट प्रधानमन्त्रीसमेत रहेका माओवादी अध्यक्ष पुष्पकमल दाहाल ‘प्रचण्ड’ ले हस्ताक्षर गरेका थिए ।

सम्झौतापछि तत्कालिन नेकपा माओवादीले १० वर्ष लामो सशस्त्र युद्ध अन्त्यको औपचारिक घोषणा गरेको थियो । सम्झौतामा उल्लेख भएअनुसार माओवादी सेनाका लडाकु समायोजन तथा संविधानसभामार्फत संविधान निर्माणको काम सकिए पनि केही काम अझै सकिएका छैनन् ।

द्वन्द्वकालिन घटनासँग सम्बन्धित सत्य निरुपण तथा मेलमिलाप र बेपत्ता खोजबिन आयोग बने पनि दुवै अयोगले काम सकेका छैनन् । द्वन्द्वकालिन घटनाबारे राजनीतिक तहमा समझदारी बन्न नसक्दा आयोगहरु प्रभावकारी देखिएका छैनन् ।