">
ताइपेइ । चीनको दबाबको बेला अमेरिकाले सहयोग गरेको भन्दै ताइवानले धन्यवाद दिएको छ । अमेरिकी राष्ट्रपति जो बाइडेन प्रशासनअन्तर्गत ताइवानसँग सम्बन्ध सुदृढ पार्ने योजना वाशिङ्टनले सार्वजनिक गरेपछि ताइवानले आइतबार अमेरिकाप्रति आभार व्यक्त गरेको हो । “हामी बेइजिङको निरन्तर दबाबको सामना गर्दै आएका थियौं । अमेरिकाले ताइवानको प्रजातान्त्रिक समर्थन गरेकोमा अमेरिकी विदेश मन्त्रालयलाई हार्दिक धन्यवाद दिन्छौं । साझा मुल्य र चासोका आधारमा हामी हिन्द-प्रशान्त क्षेत्रमा शान्ति र स्थायित्वलाई अगाडि बढाउन संयुक्त राज्यसँगको साझेदारीमा प्रतिबद्ध छौं,” ताइवानको विदेश मामिला मन्त्रालयले ट्वीटमा भनेको छ ।
ताइवानको हवाई रक्षा पहिचान क्षेत्रमा धेरै चिनियाँ लडाकू विमान प्रवेश गरेको केही घण्टापछि अमेरिकाले आफ्नो छिमेकीहरूलाई तर्साउने चिनियाँ प्रयासको वृद्धिलाई चिन्तित तुल्याएको र बेइजिङलाई ताइपेइविरुद्धको सैन्य, कूटनीतिक र आर्थिक दवाव बन्द गर्न आग्रह गरेको छ । अमेरिकी विदेश मन्त्रालयले शनिबार वाशिङ्टनका मित्र र सहयोगीहरुसँग “हिन्द-प्रशान्त क्षेत्रको साझा समृद्धि, सुरक्षा र मूल्यमान्यताहरुका लागि अग्रसर हुने’ प्रतिबद्धता जनाएको छ । जो बाइडेनले अमेरिकी राष्ट्रपति पद ग्रहण गरेको केही दिनपछि चीनले ताइवानको आकाशमा चिनियाँ वमवर्षक र लडाकु विमानहरूको उडान गरेको थियो ।
ताइवान रक्षा मन्त्रालयले भने ताइवानको वायुसेनाले १० चिनियाँ लडाकू विमानहरु ताइवानको दक्षिणपश्चिमी वायु रक्षा पहिचान क्षेत्र (एडीआईजेड) मा प्रवेश गरेको जनाएको थियो । “संयुक्त राज्यले ताइवानलगायत आफ्ना छिमेकीहरूलाई डराउने प्रयासमा चलिरहेको पीआरसीको रणनीति गम्भीररुपमा लिएको छ । हामी बेइजिङलाई ताइवानकविरुद्धको सैनिक, कूटनीतिक र आर्थिक दबाब रोक्न र त्यसको साटो ताइवानको प्रजातान्त्रिक तवरले चुनिएका प्रतिनिधिहरुसँग अर्थपूर्ण वार्तामा लाग्न आग्रह गर्दछौं,” राज्य विभागको विज्ञप्तिमा भनिएको छ ।
