काठमाडौँ । काठमाडौँमा आठौँ आयुर्वेद दिवसको अवसरमा आयुर्वेद क्षेत्रमा नेपाल–भारत सहकार्यका विषयमा छलफल कार्यक्रमको आयोजना गरिएको छ । भारतीय राजदूतावासको आयोजनामा आयुर्वेदको क्षेत्रमा भारत र नेपालबीच थप सहकार्य सम्भावनाबारे छलफल कार्यक्रमको आयोजना गरिएको हो ।
उक्त कार्यक्रममा नेपाल सरकार, नेपाल आयुर्वेद चिकित्सक संघ, नेपाल चेम्बर अफ कमर्स र नेपाल आयुष उद्योगका प्रतिनिधिहरूको सहभागिता रहेको थियो ।
कार्यक्रममा दूतावासका नियोग उप–प्रमुख प्रसन्न श्रीवास्तवले आयुर्वेद लगायत परम्परागत चिकित्सा क्षेत्रमा भारत र नेपालबीच रहेको सहकार्यबारे चर्चा गरेका छन् । उनले ज्ञान, विशेषज्ञता तथा क्षमता अभिवृद्धिको आदान प्रदानमार्फत आयुर्वेदमा सहकार्य प्रवर्द्धन गर्न चालिएका विविध पहलबारे जानकारी दिएका छन् । त्यस्तै, उनले यसवर्षको आयुर्वेद दिवसमा मनाइने उत्सव भारतको अध्यक्षतामा सम्पन्न जी–२० सम्मेलनको नारा ‘वसुधैव कुटुम्बकम’सँग मेल खानेसमेत बताएका छन् ।
नेपाल सरकार स्वास्थ्य तथा जनसंख्या मन्त्रालयको आयुर्वेद तथा वैकल्पिक चिकित्सा विभागका महानिर्देशक डा. वासुदेव उपाध्यायले आयुर्वेद नेपालको स्वास्थ्य सेवाको मान्यता प्राप्त प्रणाली भएको उल्लेख गरेका छन् । उनले नेपाल सरकारले आयुर्वेदको प्रवद्र्धनका लागि लिएको पहलबारेसमेत कार्यक्रममा प्रष्ट पारेका छन् ।
त्यस्तै, डाबर नेपालका व्यवसाय प्रमुख हरकिरतसिंह वेदीले उद्योगको धारणा व्यक्त गर्दै कसरी डाबरले नेपालबाट जडीबुटी संकलन गर्न आपूर्ति श्रृंखलाको विकास गरेको र त्यसले स्थानीय समुदायका लागि दिगो जडीबुटी खेती गर्ने अवसरहरू प्रदान गरेको छ, त्यसबारे जानकारी गराएका छन् ।
चिकित्सकको धारणा प्रस्तुत गर्ने क्रममा नेपाल आयुर्वेद चिकित्सक संघका अध्यक्ष डा.श्यामबाबु यादवले नेपालमा आयुर्वेद चिकित्साको प्रमुख अंग भएको बताए । उनले नेपालमा आयुर्वेद चिकित्साको समृद्ध इतिहासबारे जानकारी गराएका छन् । भारत सरकार, आयुष मन्त्रालयले सन् २०१६ देखि हरेक वर्ष धनवन्तरी जयन्ती (धन्तेरस)मा आयुर्वेद दिवस मनाउँदै आएको छ । सन् २०२३ नोभेम्बर १० मा मनाइने आठौं आयुर्वेद दिवसको नारा ‘एक स्वास्थ्यका लागि आयुर्वेद–हरेकका लागि हरेक दिन आयुर्वेद’ रहेको छ ।
