काठमाडौँ । भक्तपुरबाट स्रोत नखुलेको ६९ लाख रुपैयाँसहित ४ जना चिनियाँ नागरिक पक्राउ परेका छन् । भक्तपुरको सूर्यविनायक नगरपालिका–१० भातेढिकुरबाट स्रोत नखुलेको ६९ लाख ५ हजार रुपैयाँसहित ४ जना चिनियाँ नागरिक पक्राउ परेका हुन् ।

पक्राउ पर्नेमा चिनियाँ नागरिक ३२ वर्षीय झाङ युआन, ५० वर्षीय निङ झियालिन, २४ वर्षीय काओ होरान र ३६ वर्षीय डेना लाइयु रहेका छन् ।

उनीहरुलाई साँगाबाट जगातीतर्फ आउँदै गरेको अवस्थामा पक्राउ गरिएको हो । बा २ ज ५१६ नम्बरको ट्याक्सीलाई चेकजाँच गर्ने क्रममा स्रोत नखुलेको उक्त रकमसहित उनीहरुलाई पक्राउ गरिएको प्रहरीले जनाएको छ ।

हाल पक्राउ परेका चारै जनालाई थप अनुसन्धान तथा कारबाहीका लागि आन्तरिक राजस्व कार्यालय भक्तपुरमा बुझाइएको जिल्ला प्रहरी परिसर भक्तपुरले जनाएको छ।