काठमाडौँ । सरकारको आम्दानीभन्दा खर्च बढि देखिएको छ । चालु आर्थिक वर्ष २०८०/८१ सकिन लाग्दा सरकारको आम्दानीभन्दा खर्च ३ खर्ब बढि देखिएको हो । 

सरकारी खर्च म्यानेज गर्न ऋणमाथि ऋण लिइरहेको सरकारले लक्ष्यअनुसारको राजस्व संकलन गर्न नसक्दा आम्दानीभन्दा खर्च बढि देखिएको छ । यही कारण चालु आर्थिक वर्षको असार तेस्रो सातासम्म सरकारी खाता ऋणात्मक भएको छ ।

यसो त सरकारले हालसम्म विदेशी अनुदान र अन्य आम्दानीमार्फत कुल ९ खर्ब ९४ अर्ब रुपैयाँ सरकारी खातामा जम्मा गरेको छ । तर, सोही अवधिमा सरकारले कुल १२ खर्ब ९८ अर्ब रुपैयाँ खर्च गरेको छ । 

सरकारले गर्ने खर्च र लिने ऋणमध्येको ठूलो रकम कर्मचारीको तलबभत्ता तथा सुविधामा खर्च हुने गरेको छ । चालु आर्थिक वर्षको जेठसम्ममा सरकारले आन्तरिक ऋण मात्रै ३ खर्ब ७ अर्ब रुपैयाँ उठाएको छ भने ८२ अर्ब रुपैयाँ बाह्य ऋण उठाएको छ ।