काठमाडौँ । स्वास्थ्य बीमा कार्यक्रम अन्तर्गत बिरामीको उपचार नै नगरी अस्पतालहरुले फर्जी बीमा दाबी गरिरहेको पाइएको छ । नियमनकारी निकायको नियमन चुस्त नहुँदा स्वास्थ्य बीमा कार्यक्रममा आबद्ध अस्पतालहरुले बिरामीको उपचार नै नगरी फर्जी बीमा दाबी गरिरहेको पाइएको हो ।
तर, बिरामीको उपचार नै नगरी फर्जी दाबी पेश गरिरहेको विषय ‘ओपन सेक्रेट’ भए पनि त्यसतर्फ नियामक स्वास्थ्य बीमा बोर्ड भने बेखबर छ ।
स्रोतका अनुसार स्वास्थ्य बीमामा आबद्ध शिक्षण अस्पतालहरुले फर्जी दाबी गर्दै आएका छन् । फर्जी दाबी नियन्त्रणका लागि बोर्डले अनलाइन प्रणाली सञ्चालनमा ल्याएको भए पनि अस्पतालहरुले भने अहिले पनि बिरामीको उपचार नै नगरी खर्च रकम सोधभर्ना लिइरहेको स्वयम् बोर्डका अधिकारीले पुष्टि गरेका छन् ।
ती अधिकारीका अनुसार फर्जी बीमा दाबी पेश गर्नेहरुमाथि बोर्डले डण्डा चलाउन नसकेकै कारण यस्तो प्रवृत्तिले प्रशय पाएको छ । तर, फर्जी दाबी पेश भइरहेको तथा दाबी भुक्तानीको विषयमा थाहा हुँदहुँदै पनि बोर्डले एक्सन लिन नसक्दा यो प्रवृत्ति झनै विकराल बन्दै गएको ती अधिकारीले बताएका छन् ।
फर्जी दाबीबारे कानूनमा के छ ?
यसो त स्वास्थ्य बीमा ऐन २०७४ को दफा ३२ मा फर्जी दाबी पेश गर्ने सेवा प्रदायकलाई पन्ध्र हजारदेखि २५ हजार सम्म जरिवाना गरी सो जरिवाना बराबरको रकम बीमितलाई क्षतिपूर्तिस्वरुप भराउन सकिने व्यवस्था गरिएको छ । त्यति मात्रे होइन, कुनै सेवा प्रदायकले स्वास्थ्य बीमा ऐन विपरीत कार्य गरेमा बोर्डले त्यस्तो सेवा प्रदायकलाई ५ लाख रुपैयाँसम्म जरिवाना गर्न सक्ने पनि उक्त ऐनमा उल्लेख गरिएको छ ।
