काठमाडौँ । हिमालयन बैंक र सिभिल बैंकबीच बुधबार मर्जर सम्झौता हुने भएको छ । मंगलबार रातीसम्म बसेको बैठकले अन्तत: यस्तो निर्णय गरेको हो ।

मंगलबार नै बसेको एउटा बैठकपछि दुई बैंक एक आपसमा मर्जरमा नजाने मुडमा थिए । तर हिमालयन बैंक अफ्ट्यारोमा परेपछि हिमालयनले सिभिलका सबै सर्त मान्न तयार हुँदा उनीहरु बीच अन्तत: मर्जर हुने भएको हो।

सिभिल बैंकको मंगलबार साँझ बसेको संचालक समिति बैठकले हिमालयन बैंकसँगै मर्जरमा जाने निर्णय गरेको छ । बुधबार विहान  हिमालयन बैंकको कमलादीस्थित केन्द्रिय कार्यालयमा दुवै बैंकबीच मर्जरको सम्झौतापत्रमा हस्ताक्षर हुने निर्णय भएको छ । यसका लागि आवश्यक फ्लेक्स पनि प्रिन्ट भईसकेको छ।

पुरानै सहमतिबमोजिम हिमालयनले सिभिललाई प्रतिसेयर ८१ रुपैयाँ दिनेछ । हिमालयन बैंकको बोर्डमात्र नयाँ बैंकको बोर्डमा हुनेछ भने सिभिलका सुनिल पोखरेल अवको बैंकका डेपुटी सीइओ हुनेछन्।

मर्जरपछि बन्ने एकिकृत बैंकको नाम हिमालयन नै रहने छ।