काठमाडौँ ।‘एउटा साथीको साथले पनि फरक पर्दछ जिन्दगीमा…’ भनेझैँ हरेक सपलताका पछाडी कोहि खास मान्छेको साथ जरुर चाहिन्छ, त्यो चाहे मानिसको जीवन होस्, वा संस्थाको प्रगति । पूर्वको उज्यालोसँगै उदाएको तत्कालीन एनआईसी बैंकले पनि यस्तै दुरदृष्टि राख्ने नेतृत्व पायो । अझ भनौँ, प्रगति गर्नुको विकल्प छैन भनेर साथ दिने, हात दिने र बाटो देखाउने अभिभावक पायो । र त वि.सं.२०५४-५५ मा सुरु भएको एनआईसी एशियाको यात्राले आज देशको निजी क्षेत्रको नम्बर १ बैंकको ताज लगाउन सफल बनेको छ ।
हुने विरुवाको चिल्लो पात हुन्छ भनेझैँ, स्थापनाकालमा १९ जना कर्मचारीबाट सुरु भएको तत्कालीन एनआईसी बैंकले नै देशको ‘नम्बर १’ बन्ने सपना देखिसकेको थियो । र त बैंकले देखेको ‘नम्बर १’ बन्ने सपना पुरा गर्न बैंकको २५ वर्षे यात्रामा मेरुदण्डका रुपमा रहेका दुई अध्यक्षले कुनै कसर बाँकी राखेनन् । सधैं व्यवस्थापनलाई साथ दिए, नयाँ युवालाई साथ दिए । बजार बुझेको टिमले गर्ने हरेक कामलाई प्रोत्साहन दिए । नाफासँगै समाजमा दिनुपर्ने सहयोगमा कम गर्नुहुँदैन भनेर पनि साथ दिए । सबल बन्न साथ दिए, गतिशील बन्न सहयोग गरे, उत्तरदायी बन्न प्रोत्साहन गरे, र त बैंक सक्षम बन्यो । र आज सक्षमताको कडी समातेर हजार होइन, लाखौं नागरिकलाई सेवा दिईरहेको छ, एनआईसी एशिया बैंक ।
नविनतम प्रोडक्ट र प्रविधिको पहुँचमा फड्को मारिरहेको एनआईसी बैंकले अग्रवालकै कार्यकालमा नेपालमै पहिलो पटक सन् २००३ मा ‘एनआईसी लाइफ सेभिङ्ग अकाउन्ट’ नामक स्किम ल्याएको थियो । जुन प्रोडक्ट त्योबेला ऐतिहासिक मात्रै बनेन बरु धेरैको रोजाईमा समेत परेको थियो । नवौँ वर्षमा उनै अग्रवालकै नेतृत्वमा रहेको तत्कालीन एनआईसी बैंकले बाणिज्य बैंकहरुमध्ये पहिलो पटक ‘आई एस ओ ९००१ः२००८’ सर्टिफिकेशन प्राप्त गरेको थियो । सोही वर्ष बैंकले अर्को प्रगतिको अर्को फड्को मार्दै मुलुकमै पहिलो पटक आईएफसीबाट ‘लाइन अफ क्रेडिट’ प्राप्त गरेको थियो ।बैंकको संस्थापक अध्यक्ष अग्रवाल बैंकको अध्यक्षमात्रै रहेनन् । बरु बैंकले देखेको ‘नम्बर १’ बन्ने सपना पूरा गर्न उनी अहोरात्र खटिरहे । फलस्वरुप बैंकले १०औँ वर्षमा पुग्नै लाग्दा बेलायतको ‘द फाइनान्सियल्स टाइम्स’ले दिने ‘बैंक अफ दि इयर २००७’ प्राप्त गर्यो । एनआईसी एशिया बैंककै कारण नेपाली बैंकिङ्गको स्वरुप फेरीएको तर्क आजपनि धेरैले गर्छन् । बैंकले हरेक वर्ष ग्राहकका लागि केही फरक र विशेष ‘प्रोडक्ट’ वितरण गर्थ्यो । अग्रवालकै कार्यकालमा तत्कालिन एनआईसी बैंकले नेपालमै पहिलो पटक बैंकिङ्ग च्यानल मार्फत विदेशबाट सुनचाँदी आयात गरी बिक्री वितरण गर्ने अभ्यास गरेको थियो । बैंकका अध्यक्ष जगदिश अग्रवालकै कार्यकालमा बैंकले ‘एनआईसी सुपर डिपोजिट’ नामक स्किम ल्याएको थियो । जसलाई बैंकिङ्ग इतिहासमै पहिलो उच्च ब्याजदर दिने ‘फिक्स्ड डिपोपिजट स्किम’ पनि भन्ने गरिन्छ ।
बैंकले सन् २००८ देखि नै डोमेस्टिक रेमिट्यान्स सेवा सुरु गरेको थियो । त्योबेला धेरैका लागि नौलो लाग्ने यो सेवा अहिले बैंकिङ्ग सेवा लिने हरेक ग्राहकको दैनिकी बनेको छ । बैंकले अध्यक्ष अग्रवालकै पालामा पुनः ‘आइएसओ ९००१ः२००८’ सर्टिफिकेशन प्राप्त गर्यो । बैंकमा अध्यक्ष अग्रवाल नै रहँदा बैंकले भिसा डेभिड कार्ड, इन्टरनेट बैंकिङ्ग, मोबाइल बैंकिङ्ग, पीएसटीएल बिल पेमेन्ट र युटिलिटी बिल पेमेन्ट पनि सुरु गरेको थियो । सोही समयमा तत्कालीन एनआईसी बैंकले नेपाली बैंकिङ्ग इतिहासमा मर्जरको सुरुवात गर्यो । अर्थात वि.सं. २०७० सालमा तत्कालीन एनआईसी बैंक र बैंक अफ एशिया नेपालबीच मर्जर भयो । मर्जरपछि बनेको एनआईसी एशिया बैंकले अग्रवालकै कार्यकालमा पुनः ‘बैंक अफ दि इयर २०१३’ को अवार्ड प्राप्त गर्यो । अग्रवालले आफ्नो कार्यकालमा बैंकलाई अब्बल स्थापित मात्रै गरेनन्, बरु बैंक दुई–दुई पटक ‘बैंक अफ दि इयर’को अवार्डबाट सम्मानित समेत हुन सफल भयो ।
सन् २०१४ मा बैंकले पञ्चबर्षीय एकिकृत रणनीतिक योजना ‘रणनीति २०२०’ तयार गरी कार्यान्वयनमा समेत ल्याएको थियो । अग्रवालकै नेतृत्वमा रहँदा बैंकले सामाजिक उत्तरदायित्वलाई बुझ्दै नेपालमा गएको महाभूकम्प पिडीतलाई ठुलो सहयोग समेत गरेको थियो । जसलाई नेपाली बैंकिङ्ग क्षेत्रमै ऐतिहासिक सहयोगका रुपमा धेरैले लिने गरेका छन् । अग्रवालको अन्तिम कार्यकाल अर्थात आर्थिक वर्ष २०७३-७४ मा एनआईसी एशिया बैंकले एकै वर्षमा ५३ वटा शाखा विस्तार गरेर बैंकिङ्ग इतिहास रचेको थियो ।
बैंकका तत्कालीन अध्यक्ष अग्रवालकै कार्यकालमा बैंकले स्थापनाको दोस्रो वर्ष ५ मिलियन घाटा बेहोर्नु परेको थियो । ‘प्रतिक्षा र मेहेनतको फल मिठो हुन्छ’ भन्ने तथ्य मनन् गरेका अग्रवालले व्यहोर्नुपरेको घाटाप्रति चिन्ता गरेनन् । बरु अझै सशक्त र बलियो बन्ने आधार खोज्न थाले । नभन्दै अग्रवालले आफ्नो कार्यकालको अन्त्यसम्ममा घाटामा गएको बैंकको नाफा १,४७६ मिलियन पुर्याए । उनकै कार्यकालमा बैंकको शाखामा उल्लेख्य वृद्धि भएको छ भने १९ जनाबाट सुरु भएको एनआईसी एशिया बैंकमा कर्मचारीको संख्या १,७५५ पुगेको थियो ।
तुलसीराम अग्रवालको अध्यक्षतामा थप सशक्त बन्यो बैंक
एनआईसी एशिया बैंकका दोस्रो अर्थात बर्तमान अध्यक्ष तुलसीराम अग्रवालको नेतृत्वमा बैंक झनै ‘एग्रेसिभ’ रुपमा अघि बढेको छ । उनको पहिलो कार्यकाल अर्थात आर्थिक वर्ष २०७४-७५ मा बैंकले एनआईसी एशिया क्यापिटल लिमिटेडको स्थापना गर्यो । जसको प्रगतिलाई अहिले नेपालमा भएका मर्चेन्ट बैंकहरुमध्ये अब्बल मानिन्छ । उनकै कार्यकालको पहिलो वर्षमा बैंकले एनआईसी एशिया रेमिट पनि सुरु गर्यो । लगातार बैंकले एकपछि अर्को फड्को मारिरहँदा हौसिएका उनी बैंकको ‘पर्फमेन्स’ सुधारमा झनै सक्रिय देखिए । उनकै दोस्रो कार्यकालमा एनआईसी एशिया लघुवित्त वित्तीय संस्थाको पनि औपचारीक रुपमा सुरुवात भयो ।
बैंकका अध्यक्ष तुलसीराम अग्रवालकै कार्यकालमा ८६, ६९७ मिलियनबाट बढेर बैंकले ३,००,२५२ मिलियन निक्षेप संकलन गरेको छ । सोही अवधिमा बैंकले कर्मचारीको संख्यालाई पनि दुईगुणा वृद्धि गरेको देखिन्छ । यता अग्रवालकै कार्यकालमा बैंकको नाफा पनि ३,२५९ मिलियन पुगेको छ । अध्यक्ष तुलसीराम अग्रवालकै कार्यकालमा मुलुक कोरोना माहामारीको चपेटामा पर्यो । अर्थतन्त्र बिग्रिदै गयो, बैंकका अधिकांश कर्मचारी कोरोना संक्रमित पनि भए तरपनि बैंकले आफ्नो सेवालाई निरन्तर जारी राखिरह्यो । यहीबीच एनआईसी एशिया बैंक ‘बेष्ट प्रिजेन्टेड एनुअल रिपोर्ट’ (बिपिए) अवार्डबाट सम्मानित समेत भएको छ ।
बैंकका दुई अध्यक्षको अथक प्रयास, मेहेनत, दृढ संकल्प र नेतृत्वकै नजिता आज बैंक देशको अग्रणि बैंकको रुपमा स्थापित भएको छ । यसो त बैंकको ‘म्यानेजमेन्ट टिम’ तथा अन्य कर्मचारीहरुको पनि बैंकको सफलतामा ठुलो हात छ । ‘एक–एक थोपा समुन्द्र बन्छ’ भनेझैँ साँच्चै आज एनआईसी एशिया बैंक विश्वासका तीनै एक-एक कण बटुलेर देशको नम्बर १ बैंक बन्न सफल भएको छ ।
