काठमाडौँ । पोखरामा विद्यालयका ११ ल्यापटप चोरी गर्ने ४ जना बालक पक्राउ परेका छन् । पोखरा महानगरपालिका–३३ बरपाण्डेथुमस्थित शान्ति उदय माविको ११ वटा ल्यापटप चोर्ने पोखरा–३३ बस्ने ४ जना बालक पक्राउ परेका हुन् । 

पक्राउ परेका उनीहरुले विद्यालयको ढोका फोडेर ११ थान ल्यापटप, ७ थान चार्जर, ५ थान माउससहित अन्य सामाग्रीहरु चोरी गरेका थिए । 

चोरीका क्रममा उनीहरुले विद्यालयका अन्य कम्प्युटर, ल्यापटप, सीसीक्यामेरा तथा प्रोजेक्टर लगायतका सामानमासमेत क्षति पुर्याएको प्रहरीले जनाएको छ । 

पक्राउ परेकाहरुको साथबाट प्रहरीले बिग्रिएका ३ थान र चालु अवस्थाका ७ थान ल्यापटप बरामद गरेको छ । उनीहरुविरुद्ध जिल्ला अदालतबाट ५ दिनको म्याद थप गरी अनुसन्धान भइरहेको प्रहरीले जनाएको छ ।