काठमाडौँ । फर्जी मत खसेको हल्लापछि नेपाल चार्टर्ड एकाउन्टेन्ट्स संघ (एक्यान)का सदस्यले मतदाताहरुको ‘उपस्थिति पुस्तिका’ माग गरेका छन् । सिए सविन कार्की र सिए मिनार ढकालले संघमा लिखित निवेदन दिएर सो उपस्थिति पुस्तिका माग गरेका हुन् ।

एक्यानको चुनावमा चुनावका दिन विदेशमा रहेका सिएको नाममा किर्ते हस्ताक्षर गरेर मतदान गरेको हल्लापछि सिएहरुले सो पुस्तिकाको माग गरेका हुन् ।

यता निर्वाचन अधिकृत गोपाल श्रेष्ठले भने चुनावमा केहि विवाद हुनु सामान्य रहेको प्रतिक्रिया दिएका छन् । ‘चुनावमा विवाद हुनु सामान्य हो ।’ श्रेष्ठले अर्थ सरोकारसँग भने, ‘यस्ता विवाद चुनावमा भईरहन्छ ।’ उनले चुनाव निष्पक्ष भएको दाबीसमेत गरेका छन् ।

गत शनिबार भएको निर्वाचनमा १९३६ मत खसेको थियो । यो संख्या कुल मतदाता संख्याको ८५ प्रतिशत हो ।

सदस्यहरुले भने उपस्थिति पुस्तिका उपलब्ध नभए अदालत जाने तयारी गरेको बताएका छन् । ‘केहि साथीहरुले उपस्थिति पुस्तिका हेर्ने भन्नुभएको छ । विदेशमा रहेकाको नाममा नेपालमा फर्जी मत हालिएको शंका छ । उपस्थिति पुस्तिका उपलब्ध गराईएन भने निर्वाचन अधिकृतलाईसमेत विपक्षी बनाएर अदालतमा मुद्धा हाल्ने तयारी गरेका छौँ ।’ ती सदस्यले अर्थ सरोकारसँग भने, ‘किर्तेजस्तो जघन्य अपराध भएको शंका छ । यसमा आवश्यक छानविन हुन आवश्यक छ । त्यसो भएन भने हामी जस्तोसुकै परिस्थितिका लागि पनि तयार हुनुपर्छ ।’