- सुदर्शन श्रेष्ठ/अर्थ सरोकार सुदूरपश्चिम ब्युरो
धनगढी । कोरोना माहामारी रोकथाम तथा नियन्त्रणका लागि लामो समयदेखी भएको बन्दाबन्दीका कारण व्यवसाय धरासायी बनेको भन्दै यातायात व्यवसायीहरुले प्रधानमन्त्रीलाई ज्ञापन पत्र बुझाएका छन् । आईतबार सार्वजनिक यातायात केन्द्रिय महासंघ नेपाल सुदूरपश्चिम प्रदेशले जिल्ला प्रशासन कार्यालय कैलाली मार्फत आफ्ना मागसहित प्रधानमन्त्री केपि शर्मा ओलीलाई ज्ञापन पत्र बुझाएका हुन् ।
कोरोना माहामारीको पहिलो चरणमा लामो समय भएको बन्दाबन्दी प्रश्चात केही राहत भएको भएतापनि पुनः कोरोनाको दोस्रो लहरले यातायात व्यवसाय धरापमा परेको व्यवसायीहरुले बताएका छन् । सार्वजनिक यातायात पुर्ण रुपमा ठप्प हुँदा पनि बैङ्कको ब्याज-ऋण र साहुको किस्ताका कारण मर्कामा परेको सार्वजनिक यातायात केन्द्रिय महासंघ नेपाल सुदूरपश्चिम प्रदेश समितीका अध्यक्ष दिल बहादुर खोलौलाले बताए । उनले भने, ‘यसरी धरासायी भएर यातायात चलाउन सक्ने अवस्थामा छैनौँ, हाम्रो समस्याप्रति सरकारको ध्यान जानुपर्छ ।’
त्यस्तै ज्ञापनपत्र बुझाउँदै व्यवसायीहरुले माग सम्बोधन नभए चरणबद्ध आन्दोलनमा जाने चेतावनि समेत दिएका छन् । ‘हाम्रा पिरमर्का, समस्या, गुहार-अनुरोध गर्दा गर्दै पनि सम्बन्धित सरोकारवाला निकायबाट सम्बोधन नभएमा हामी सम्पुर्ण यातायात व्यवसायी आ आफ्नो सवारी साधनहरु बैङ्क तथा वित्तिय संस्थाका आगनमा खडा गरी, साँचो बुझाई आफ्नो लगानि फिर्ता माग्न बाध्य हुनेछौँ’, ज्ञापन पत्रमा उल्लेख गरिएको छ ।
