काठमाडौँ । नेपाल धितोपत्र बोर्डका कर्मचारीले बोर्ड अध्यक्षको गाडीको चाबी खोसेका छन् । खाइपाई आएको सेवासुविधा खोसेको भन्दै धर्नासहित विरोधमा उत्रिएका बोर्डका कर्मचारीले बोर्ड अध्यक्ष सन्तोषनारयाण श्रेष्ठको गाडीको चाबी खोसेका हुन् ।
उनीहरुले बोर्ड अध्यक्ष श्रेष्ठविरुद्ध नाराबाजी गरेका छन् । नाराबाजी गर्दै कर्मचारीहरुले बोर्ड अध्यक्षसहित बोर्डका कार्यकारी निर्देशकहरुको राजिनामा मागेका छन् ।
राजस्व सचिव दिनेश कुमार घिमिरेले सचिवस्तरीय निर्णयबाट बोर्डका कर्मचारीले खाइपाई आएको सुविधा र कर्जा सुविधा कटौती गर्न निर्देशन दिएका थिए । सोही निर्देशनको विरोध गर्दै बोर्डका दुवै कर्मचारी युनियन धर्नामा उत्रिएका छन् । उनीहरुले कि सो निर्णय सल्टाउन वा राजिनामा दिन माग गरेका छन् ।
आन्दोलनरत बोर्डका कर्मचारीहरुले बोर्डमा तालाबन्दीसमेत गरेका छन् । उनीहरुले माग पूरा नभएसम्म काममा नफर्किने चेतावनीसमेत दिएका छन् ।
