काठमाडौँ । काठमाडौँमा एकदिनमै ३ हजार ७५ ग्यास सिलिन्डर साटिएका छन् । दशैँको मुखमा ग्यास अभावलाई सहज गर्न भन्दै फरक कम्पनीका ३ हजार ७५ ग्यास सिलिन्डर साटिएका हुन् । 

दशैँको मुखमा नेपाल आयल निगमको समन्वय र ग्यास बिक्रेता महासंघको सहकार्यमा काठमाडौँका ६ स्थानबाट फरक कम्पनीका ग्यास सटही भइरहेको छ ।

निगमका अनुसार ललितपुरको हरिसिद्धिमा श्रीराम ग्यास, काठमाडौँ कलंकीमा साइबाबा र श्रीकृष्ण तथा सुकेधारामा बाबा र श्री ग्यास साटिएको छ । भने बालाजु औद्योगिक क्षेत्रको गेटअगाडि नेपाल, एचपी, गीता, राजधानी र त्रिवेणी ग्यास वितरण भइरहेको छ । 

त्यस्तै, पेप्सीकोलामा सगर र सिफलचौरस्थित ग्यास एन्ड अक्सिजन ट्रेडर्सबाट एभरेस्ट र सुगम ग्यास साट्न सकिने व्यवस्था मिलाइएको निगमले जनाएको छ । यी ठाउँमा उपभोक्ताले आफूसँग भएको जुनसुकै खाली सिलिन्डर साटेर ग्यास लिन सकिनेछ । सिलिन्डर साटेबापत अतिरिक्त शुल्क तिर्नुपर्ने छैन ।