नयाँ दिल्ली । तिब्बती धर्म गुरु दलाई लामाले भारतमा फैलिरहेको कोरोना महामारीको दोस्रो लहरविरुद्ध लड्नका लागि प्रधानमन्त्री केयर फन्डमा सहयोग गरेका छन् । भारतमा पछिल्लो समय कोरोना महामारीको दोस्रो लहर तीव्ररुपमा वृद्धि भइरहेको छ । पीएम केयर फन्डमा सहयोगपछि जारी गरेको एक वक्तव्यमा उनले कोभिड महामारीले विश्वमा नै नयाँ चुनौतीको सिर्जना गरेको बताएका छन् । यसबाट मुक्त हुनका लागि सबैले आफ्नो क्षेत्रबाट सहयोग गुर्नुपर्नेसमेत उनले बताएका हुन् ।
विज्ञप्तिमा भनेका छन्, कोरोना संक्रमणको बढ्दो स्थितिले सिर्जना गरेको कोरोना महामारीजस्तो कठिन समयमा दलाई लामा ट्रष्टमार्फत कोरोनाविरुद्धको भारतका लडाइँमा एक्यबद्धता जनाउनका लागि पीएम केयर फण्डमा सहयोग गर्न म आग्रह गर्दछु । उनले कोरोना महामारी नियन्त्रणका लागि सरकारले गरिरहेको प्रयासको प्रशंसासमेत गरेका छन् । फ्रन्टलाइनमा रहेर कोरोनाविरुद्ध लडिरहेको योद्धाहरु उनले सम्मान व्यक्त गर्नुका साथै यो महामारीको त्रास चाँडै अन्त्यकोसमेत कामना गरेका छन् ।
भारत सरकारले सन् २०२० मा कोरोना महामारीको पहिलो लहरका क्रममा पीएम केयर फण्ड सुरु गरेको थियो । जसमार्फत सरकारले दैनिक मजदुरी गर्ने, खाना लाउन समस्या भएका व्यक्तिहरु तथा गरिब र असहायहरुलाई सहयोग गर्दै आएको छ । भारतमा पछिल्लो समय दैनिक लाखौं संक्रमितहरु फेला परिरहँदा स्वास्थ्य प्रणालीले नै धान्न नसक्ने अवस्था सिर्जना भएको छ । उक्त अवस्थालाई नियन्त्रण गर्न भारतका कयौं सहरहरुमा लकडाउन गरिएको छ । सरकारले लकडाउनको पूर्ण पालना गर्नसमेत नागरिकमा अपिल गरेको छ ।
