कञ्चनपुरको झलारीपिपलाडी नगरपालिका–४ मा रहेको राष्ट्रिय माविमा प्राविधिक शिक्षा सञ्चालन गर्न आयोजित धार्मिक महायज्ञबाट रु २१ लाखभन्दा बढी रकम सङ्कलन भएको छ ।

विद्यालयले आयोजना गरेको महायज्ञमा रु २१ लाख ९३ हजार सङ्कलन भएको छ । सात दिनसम्म सञ्चालन भएको उक्त महायज्ञ आयोजक समितिका कोषाध्यक्ष मधु बोहराले आर्थिक प्रतिवेदन सार्वजनिक गर्दै रु १८ लाख नगद र तीन लाख बराबरको जग्गा उपलब्ध भएको जानकारी दिनुभयो ।

शिक्षाको सहयोगार्थका साथै आध्यात्मिक चिन्तन र भावनामा अभिवृद्धि गर्ने उद्देश्यले यहाँ पहिलोपटक महायज्ञ सञ्चालन भएको थियो । आयोजकले जिल्लाको ग्रामीण भेगमा पर्ने पिपलाडीमा पहिलोपटक धार्मिक तथा शैक्षिक महोत्सवले वैदिक धर्म–संस्कृतिको संरक्षण तथा विकासका साथै ग्रामीण क्षेत्रको विद्यालयमा प्राविधिक शिक्षा सञ्चालनका लागि आर्थिक सङ्कलन भएको आयोजकले जनाएको छ ।