काठमाडौँ । प्रतिगमनविरुद्ध भन्दै माधव नेपाल- प्रचण्ड समूहले ‘बिहीबार गर्ने भनिएको नेपाल बन्द फिर्ता’ भन्दै यसका विरोधीहरुले अभियान थालेका छन् । नेपाल बन्दले कसैलाई पनि फाइदा नहुने भन्दै ‘नेपाल बन्द फिर्ता अभियान’ सुरु भएको हो ।

नेपाल बन्द गर्दा कसैलाई पनि फाइदा नहुने र देशले घाटामात्र व्यहोर्ने भन्दै नेपाल बन्द फिर्ता अभियान सुरु भएको हो यस अभियान अन्तर्गत बिहीबार बन्दको अवज्ञा गर्ने कार्यक्रमसमेत रहेको छ ।

यस्तै बिहीबार गर्न लागिएको बन्द सदाका लागि बन्द गर्न अनेरास्ववियूले अभियान चलाउने भएको छ । तत्कालका लागि सामाजिक सञ्जालमा ‘बन्द सदाका लागि बन्द गराैँ’ भन्ने व्यानर बनाएर अभियान सुरू गरिएको अनेरास्ववियूका संयोजक ऐन महरले जानकारी दिए ।

उक्त व्यानर अहिले हजाराैँले फेसबुकमा सेयर गरिसकेका छन । यसअघि संयोजक महरले बन्दको नाममा हुने सबै कामको प्रतिवाद गर्ने चेतावनी दिएका थिए । उनले नेकपाको २३ गतेको सभा प्रभावित गर्ने गरी हुन लागेको बन्द जसरी पनि असफल बनाउनु पर्ने बताएका छन् । उनले अब विकास र समृद्धिका लागि सबैले आफ्नो स्थानबाट योगदान गर्नुपर्ने बताएका छन् ।

यस्तै नागरिक समाजका अगुवा, पत्रकार तथा प्रचण्ड समूहकै अधिकांश भन्दा बढी कार्यकर्ताले बन्दको बिरोध गरेका छन । पूर्व प्रहरी रमेश खरेलले पनि भिडियो सन्देश दिँदै बन्द हड्ताल कुनै पनि मानेमा स्वीकार्न नसकिने बताएका छन ।