पूर्वराजा ज्ञानेन्द्र शाहको प्रत्यक्ष लगानी रहेको दमकको हिमालय टि गार्डेन एण्ड फार्मिङले सम्पत्ति करबापतको रकम तिर्न बाँकी रहेको खुलेको छ । फार्मिङले करिब एक करोड ५० लाख रुपैयाँ बराबरको कर तिर्न बाकी रहेको हो ।

पटकपटक ताकेता गर्दा पनि कम्पनीले रकम तिर्न आनाकानी गरेको छ । दमक नगरपालिकाले एकीकृत सम्पत्ति कर लागु गरे यता दशवर्षको अवधिमा गुडरिकले एक करोड ६७ लाख ३२ हजार दुईसय ४३ रुपैया उठाउन वाँकी रहेको जनाएको छ ।

०६२/०६३ सालदेखि गएको आर्थिक बर्ष ०७१/०७२ सम्म दमक–१५ स्थित गुडरिकले त्यति सम्पति कर बुझाउन बाँकी देखिएको नगरपालिकाको राजस्व शाखाका प्रमुख टिकाराज दाहालले जानकारी दिए । बगानले नियमानुसार एकीकृत सम्पत्ति कर हालसम्म बुझाएका छैनन् । नगरपाालिकाले गुडरिकलाई पटकपटक सम्पत्ति कर बुझाउन अनुरोधका पत्रहरु पठाएको थियो । तर गुडरिकले पत्रबारे कुनै तदारुकता देखाएको छैन । शाखा प्रमुख दाहालले भने, ‘हाम्रो पत्रको बारेमा बगान सञ्चालक बेखबर जस्तै बनेका छन् । पटकपटक पत्र पठायौँ, तर कुनै जवाफ आएको छैन ।’

दमक नगरपालिका बडा नम्बर ९ र १५ मा अवस्थित बगान करिब पाँचसय ७६ बिगाहा क्षेत्रफलमा रहेको छ । बगानको पूर्ण स्वामित्व पूर्वराजा ज्ञानेन्द्रकै छ । पूर्वी नेपालको भम्रणको बेला उनी सोही बगानमा बस्ने गरेका छन् । बगानमा चियाको खेती लगाइएको खबर विराटपथडटकमले लेखेको छ ।