कोरियन गाडी निर्माता कम्पनी हुण्डाईका दुई नयाँ मोडल नेपालको बजारमा भित्रिएका छन् । हुण्डाई गाडीको आधारिक बिक्रेता लक्ष्मी इन्टरकन्टिनेन्टलले ‘इलाइट आई २०’ र क्रसओभर ‘आई २० एक्टिभ’ नेपालमा सार्वजनिक गरेको हो ।
भारतीय बजारमा दुबै मोडललाई अत्याधिक रुचाइएको र नेपालका मध्यमवर्गीय परिवारलाई लक्षित गर्दै नयाँ मोडल भित्राएको कम्पनीको भनाइ छ । यसअघि बजारमा आएको हुन्डाइ ‘आई १०’, ‘ग्राण्ड आई १०’ र ‘आई २०’ नेपाली उपभोक्तामाझ लोकप्रिय बन्न सफल भएको कम्पनीको दाबी छ ।
आई २० एक्टिभको बेस भर्सन ३२ लाख ५६ हजार रुपैयाँमा उपलब्ध छ । त्यसैगरी एस भर्सन ३५ लाख ५६ हजार, बेस डिजेल ३७ लाख ५६ हजार, एस डिजेल ४० लाख ५६ हजार र एसएक्स डिजेल ४३ लाख ५६ हजार रुपैयाँमा उपलब्ध भएको कम्पनीले जानकारी दिएको छ ।
फ्लुइडिक स्क्ल्पचर २.० फिलोसोफिमा बनाइएको यो गाडी स्पोर्टी लुकमा छ । जर्मनीमा डिजाईन गरिएको ‘आई २० इलाइटको एरा भर्सन २७ लाख ९६ हजार रुपैयाँमा बिक्री हुनेछ । म्याग्नाको मूल्य २९ लाख ९६ हजार, स्पोर्टजको ३२ लाख ५६ हजार र आस्टा भर्सन ३३ लाख ९६ हजार रुपैयाँमा बिक्री हुने कम्पनीले जनाएको छ ।
