नेपाल टेलिभिजनमा मन्त्री डा. रिजालको गलत क्रियाकलापका कारण कर्मचारी आन्दोलनमा उत्रने तयारीमा गरिरहेका छन् । मन्त्री रिजालले संस्थानका अध्यक्ष तथा सञ्चालक समितिको सदस्य पदमा नियुक्त गर्नै नमिल्ने व्यक्तिलाई नियुक्ति गरेको भन्दै कर्मचारी आन्दोलनको तयारीमा जुटेका हुन् । संस्थानका अध्यक्ष नीर शाहले संस्थानलाई ५४ लाख रुपैयाँ तिर्न बाँकी छ ।
साँग्रिला च्यानलले नेपाल टेलिभिजनमा कार्यक्रम सञ्चालन गरेबापतको रकम टेलिभिजनलाई तिर्न बाँकी रहेको हो । च्यानलका सञ्चालक शाह नै हुन् । एकातिर प्रतिस्पर्धी च्यानलका सञ्चालकलाई नेपाल टेलिभिजनको अध्यक्षमा नियुक्त गर्न नमिल्ने कानुनी व्यवस्था मिचिएको छ भने संस्थानमा आर्थिक कारोबार र भुक्तानी बाँकी व्यक्तिलाई नियुक्त गर्न नमिल्ने कानुनको ठाडो उल्लंघन भएको छ ।
यतिखेर सरकार फेरिने हल्लासँगै अध्यक्ष शाह रकम तिर्न आलटाल गरी मिनाह गराउने प्रयासमा लागेका छन् । यसअघि ५४ लाख नै मिनाह गराएका शाहको यसपटकको आगमनमा बाँकी रकम मिनाह गराउने प्रयास असफल हुने भएको छ । रकम तिर्न बाँकी रहेको भन्दै कर्मचारीले अख्यिारमा उजुरी हालेको र अख्तियारले छानबिन थालेपछि शाह कर्मचारीविरुद्ध खनिएका छन् । कर्मचारीले शाहको नियुक्ति खेलकुदमन्त्रीले गरेको नियुक्ति भन्दा पनि बलमिच्याइ र शक्तिको दुरुपयोग भएको भन्दै मन्त्री रिजाललाई समेत कारबाही हुनुपर्ने बताउन थालेका छन् ।
मन्त्री रिजालले गरेको सञ्चालक समिति सदस्य पदको नियुक्तिसमेत विवादित देखिएको छ । मन्त्री रिजालले गतसाता नेपाल टेलिभिजनका स्थानीय समाचारदाता भोला थापालाई सञ्चालक समिति सदस्यमा नियुक्ति गरेका थिए । थापा एकातिर संस्थानकै स्थानीय समाचारदाता हुन् भने अर्कातर्फ अरनिको टेलिभिजनका अध्यक्ष ।
समान प्रकृतिको व्यवसायमा संलग्न व्यक्तिलाई सञ्चालकमा नियुक्ति गर्न नपाउने प्रावधानको ठाडो उल्लंघन मन्त्रीले गरेका हुन् । मन्त्री रिजालले नेपाल टेलिभिजनको सल्लाहकारमा त्यहीँका नायब महाप्रवन्धक दीपकमणि धिताललाई नियुक्त गरेका छन् । संस्थानकै बहालवाला कर्मचारी कसरी सल्लाहकारमा नियुक्त गर्न मिल्छ ?
मन्त्रालयका अधिकारीनै प्रश्न गर्छन् । मन्त्री रिजालका यस्ता विवादास्पद नियुक्ति यतिमा सीमित छैन । मन्त्री रिजालले संस्थानका महाप्रबन्धक लक्ष्मण हुमागाइँलाई मन्त्रालयमा हाजिर गराई त्यहाँ निमित्त महाप्रबन्धकको जिम्मेवारी उनै दीपकमणि धिताललाई दिएका थिए । संस्थानका महाप्रबन्धक पदमा हुँदाहुँदै मन्त्रालयमा हाजिर गराउने कुनै प्रावधान नै छैन । त्यतिमात्र होइन, धिताल भन्दा वरिष्ठ नायब महाप्रबन्धक हुँदाहुदै कनिष्टलाई निमित्त दिनु नेपाल टेलिभिजनको विनियम विपरितको काम हो । नियमविपरित भएका यी सबै कामको छानबिन हुनुपर्ने माग कर्मचारीले गरेका छन् ।
त्यसबाहेक मन्त्री रिजालको निर्देशनमा संस्थानको कानुनी सल्लाहकार ज्ञानेन्द्र नेपाललाई हटाई गान्धी पण्डितलाई नियुक्त गरिएको छ । मासिक १० हजारमा काम गर्ने नेपाललाई हटाई पण्डितलाई ३० हजार रुपैयाँ दिइएको छ । पण्डितले नेपाल भन्दा पनि कनिष्ट वकिललाई १० हजार दिई बाँकी रकम मन्त्री र अध्यक्ष नीर शाहलाई चढाउने गरेको कर्मचारी टेलिभिजनकै क्यान्टिनमा खासखुस गरिरहेका हुन्छन् ।
मन्त्रीकै निर्देशनमा नेपाल टेलिभिजनको कार्यक्रम तीन वर्षका लागि मिडिया हबलाई दिने र कार्यक्रम मिडिया हबलाई दिएवापत करिब तीन करोड कमिसन खाने काम संस्थानमा भएको छ । काममा नेपाल टेलिभिजनका अध्यक्ष नीर शाह, निमित्त महाप्रबन्धक दीपकमणि धिताल, कर्मचारी संघका अध्यक्ष एवं सञ्चालक समितिका सदस्य गोविन्द धिताल र मिडिया हबका सोम धितालबीच मिलेमतो भएको छ । सम्झौताबमोजिम तीन वर्षमा वार्षिक २० देखि २५ करोडका दरले करिब ७० देखि ७५ करोडको कारोबार मिडिया हबले पाउने र कारोबार एकलौटी गर्न दिएवापत तीन करोड कमिसन प्राप्त हुने छ । कमिसन मन्त्रीदेखि संस्थानका अधिकारीबीच भागवण्डा हुनेछ ।
यति ठूलो घटना हुँदासमेत अख्तियार दुरुपयोग अनुसन्धान आयोग चुप लागेर बसेको छ । खेलकुदमन्त्री पुरुषोत्तम पौडेललाई कारबाहीको निर्देशन दिने आयोगले काँग्रेसी मन्त्री त्यसमा पनि विराटनगरवासी यी मन्त्रीलाई कारबाहीको निर्देशन दिन सक्छ ? जबकि यसमा पनि कर्मचारीले अख्तियारमा उजुरी गरेका छन् ।
यसअघि पनि उजुरी
नेपाल टेलिभिजनले यसअघि विना लिखित अन्तरवार्ता कर्मचारी भर्तीको प्रयास गरेको थियो । नेकपा (एमाले)को भ्रातृसंगठनले यो प्रक्रिया रोक्न अख्तियारमा उजुरी गर्दा उनै लोकमानसिंह कार्कीलाई फोन गरेर अध्यक्ष नीर शाहले भनेका थिए, ‘नीर शाह भएको ठाउँमा त्यस्तो होला त ?’ त्यसपछि अख्तियारले यो प्रक्रियामा हात नहालेपछि प्रेस चौतारीले संसदकै समिति पुग्नु परेको थियो र समितिको पत्रपछि नीर शाह र मन्त्रीको काँग्रेसी कार्यकर्ता भर्ती रोकिएको थियो । यसपटक पनि एमालेका टंक पन्तको पदावधी सकिएपछि सत्ता साझेदार पार्टीसँग छलफल नगरी मन्त्रीले एकलौटीरुपमा आफ्ना जिल्ला समाचारदातालाई सदस्य नियुक्ति दिएका हुन् । -नेप्लिज डट ओआरजीबाट
