चार दलको बैठकमा सहभागी हुन मधेसी जनअधिकार फोरम लोकतान्त्रिकका अध्यक्ष विजय गच्छदार प्रवेश गरेलगत्तै एकाएक दर्जन बढीको संख्यामा थारु नेता र सभासदको हुलै बालुवाटार प्रवेश गरेको हो ।

एकाएक थारु नेताको हुलै बालुवाटार प्रवेश गरेपछि त्यहाँ उपस्थित नेता र सुरक्षामा खटिएका सुरक्षाकर्मी अचम्ममा परेका थिए । तर, उनीहरुले शीर्ष नेताहरुले बैठकमा बोलाएर आएको बताएपछि अवस्था समान्य भएको थियो ।

संविधान निर्माण प्रक्रियाबाट बाहिर रहेका शक्तिलाई सहमतिमा ल्याउन बालुवाटारमा छलफल गरिरहेका चार दलका शीर्ष नेताले बोलाएपछि थारु नेताहरु आफ्नो पुरै फौज ल्याएर आएका हुन् ।

शीर्ष नेताको आग्रह थारु नेताहरु पनि आजैदेखि वार्तामा आएका छन् । चार दलको बैठकमा सहभागी हुन थारु नेताहरु राजकुमार लेखी, रुक्मणी चौधरी, अमनलाल मोदी र मिनराज थारु, थारु संघर्ष समिति पदाधिकारी लगायत झण्डै आधा दर्जन थारु सभासदहरु पनि बालुवाटार आएका छन् ।

अहिले चार दल र थारु नेताहरुबीच संयुक्त वार्ता सुरु भएको छ । चार दलका शीर्ष नेताको आग्रहमा थारु नेताहरु वार्ता प्रक्रियामा सहभागी भएपछि अब छिट्टै सहमति हुने नेताहरुले बताएका छन् । बालुवाटार बैठकमा सहभागी एक नेताका अनुसार थारुहरुलाई सहमतिमा ल्याउन सबै गम्भीर देखिएकाले वार्ताले आजै सार्थकता पाउने सम्भावना रहेको बताए ।

बैठकमा प्रधानमन्त्री सुशील कोइराला, नेकपा एमालेका अध्यक्ष केपी शर्मा ओली, एमाओवादी अध्यक्ष पुष्पकमल दाहाल, फोरम लोकतान्त्रिकका अध्यक्ष विजय गच्छदार लगायत दोस्रो तहका नेता सहभागी छन् ।