हो, निर्मल निवास पूर्वराजा ज्ञानेन्द्रको र जीवन कुञ्ज तत्कालीन अधिराजकुमार स्व.धीरेन्द्रको बासस्थान । अहिले वारि र पारिको दूरी बढेको चाहिँ पूर्वयुवराज पारस र पत्नी हिमानीको सन्दर्भमा हो । भाइरलको संक्रमणले झण्डै एक साता थला परेकी हिमानी बालबच्चा लिएर सासुससुरासँगै निर्मल निवासमा बस्छिन् । तर, एकहप्तासम्म १०२ र १०३ ज्वरोले उनी थलिँदा जीवन कुञ्ज बस्ने पारस एकचोटि पनि पत्नीलाई हेर्न गएनन् । गत महिना पारस मुटुमा समस्या आएपछि उपचारार्थ थापाथलीस्थित नर्भिक अस्पताल भर्ना हुँदा एकचोटि पुगिन् । उनी औपचारिकताका लागि मात्र गएको पारसले आफ्ना साथीहरुलाई सुनाएका छन् ।
‘हस्पिटलमा किन फेसन शो गरेको होला’, पारसले एक निकटस्थसँग त्यसैबेला भनेका थिए । हिमानी भाइरलले थलिँदा बरु बालुवाटारमा कार्यालय रहेको हिमानी ट्रस्टका कर्मचारीहरु लाइन लागेर भेट्न पुगे, पल्लो घरमा बस्ने पति भने एकचोटि पनि गएनन् । निर्मल निवासस्रोत भन्छ, हिमानीसँग पारसको सम्बन्ध औपचारिक मात्र हो । थाइल्यान्डबाट फर्किनासाथ बहिनी प्रेरणाको ताहाचलस्थित घरमा बसेका पारस अहिले पनि त्यहीँ बस्न चाहन्छन् ।
तर, बहिनीको घरमा बस्दा अरुले भन्ने मौका पाए भन्दै धीरेन्द्रका छोरीहरुको सल्लाहमा जीवनकुञ्ज बस्न थालेका हुन् । पारसले अहिले पनि आफू स्वतन्त्रपूर्वक बस्न चाहेको बताउँछन् । तर, ज्योतिषहरुले पनि उनलाई केही समय एक्लै बस्न नदिनु, परिवारभित्रै पनि नराख्नु भनी सल्लाह दिएको स्रोतले बताएको छ । उनीहरुकै सल्लाहअनुसार, निर्मल निवासमा ग्रहशान्तिको पूजा लगाइयो, तर ग्रह भने अझै शान्त नभएको समाचार जनआस्थाले लेखेको छ ।
