गत आर्थिक वर्ष २०७२÷०७३ मा एसओएस म्यानपावर सर्भिस प्रालिले ९ हजार ७ सय ७२ जना नेपालीलाई वैदेशिक रोजगारीको लागी विदेश पठाएर यस वर्ष वैदेशिक रोजगारमा पठाउने म्यानपावरहरुको सूचिमा पहिलो भएको छ भने रिजा ओभरसिज इम्प्लोइमेन्ट प्रालिले १ जना कामदार विदेश पठाएर सूचिको अन्तिम स्थानमा छ ।

एसओएस म्यानपावरले ९ हजार ७ सय ४० जना पुरुष र ३२ जना महिलालाई वैदेशिक रोजगारीमा पठाएको र रिजा ओभरसिज इम्प्लोइमेन्टले १ जना महिला विदेश पठाएको वैदेशिक रोजगार विभागले जनाएको छ । 

वैदेशिक रोजगार विभाग काठमाडौं कार्यालय ताहाचलले प्रभावलाई दिएको जानकारीअनुसार द रिभर ओभरसिज प्रालिले ५ हजार ५ सय ९० जना कामदार विदेश पठाइ सूचिको दास्रो स्थानमा पर्न सफल भएको छ ।

त्यसैगरी प्याराडाइज इन्टरनेशनल प्रालिले ५ हजार ३ सय ५३ जना कामदार विदेश पठाइ तेस्रो स्थानमा परेको छ भने, स्काई ओभरसिज सर्भिस प्रालिले ४ हजार कामदार विदेश पठाइ सूचिको चौँथो स्थानमा रहेको छ ।  त्यसैगरी साउन्डलाइन्स रिक्रुटमेन्ट प्रालिले ३ हजार ६ सय ३२ जना कामदार विदेश पठाई पाँचौ भएको छ । 

उसैगरी ३ हजार ४ सय २३ जना कामदार विदेश पठाई कोशी इन्टरनेशनल सर्भिसेज प्रालि यस वर्ष छैठौँ स्थानमा परेको छ भने ३ हजार २ सय ४४ जना कामदार पठाएको ओशो रिक्रुटिङ एजेन्सी विदेश पठाउने म्यानपावरहरु मध्ये सातौँ स्थानमा छ । भिजन एन्ड भ्यालु ओभरसिज प्रालिले ३ हजार १ सय २४ जना कामदार पठाई सूचिको आठौँ स्थानमा रहेको छ ।

उसैगरी ३ हजार ६४ जना कामदार पठाएका अक्सफोर्ड इन्टरनेशनल प्रालिसूचिको नवौं स्थानमा परेको छन् । उता कोमल इन्टरनेशनल सर्भिस प्रालिले २ हजार ९ सय ५५ कामदार विदेश पठाइ सूचिको दशौँ स्थानमा परेको छ ।  १ जना मात्र वैदेशिक रोजगारीमा पठाइएको रिजा ओभरसिज प्रालि सूचिको अन्तिम स्थानमा परेको छ भने ४ जना पुरुष कामदार विदेश पठाएको रिलाएन्स नेपाल इन्टरनेशनल ओभरसिज प्रालि, सिटीजन ओभरसिज सर्भिस प्रालि र अरुण ओभरसिज प्रालि सूचिको दोस्रो अन्तिम स्थानमा परेका छन् ।

गत आर्थिक वर्षमा ३ लाख ५३ हजार ८ सय ७५ जना पुरुष र १४ हजार ५ सय ३ जना महिला कामदार गरी कुल ३ लाख ६८ हजार ३ सय ७८ जना नेपालीहरु वैदेशिक रोजगारीमा गएको वैदेशिक रोजगार विभाग काठमाडौं कार्यालय ताहाचलले तथ्यांक उपलब्ध गराएको छ ।