• अर्थ सरोकार सम्बाददाता 

काठमाडौं-  आमाका बारेमा खुब चर्चा हुने गर्दछ हाम्रो समाजमा । तर आमाका बारेमा मात्र चर्चा हुने गरेको यो समाजमा एक ट्वीटर प्रयोगकर्ता बिजय कुमार पाण्डेले बाबुका बारेमा गरेको ट्वीले चौतर्फी चर्चा पाएको छ । २७ मे २०१५ मा गरिएका यी ट्वीटहरु आज पनि उत्तिकै सान्दर्भिक छन् । र रहिरहनेछन् पनि।  

हे बाबा! तिम्रा पनि त गुनासाका पोका होलान् नि हगि, कति दु:ख गरेर घरखर्च जोहो गरेउ… केवल भान्सा धानेर बसेकी आमाले तिम्लाइ ओझेलमा पारिन्।

— विजय कुमार पाण्डे (@meVeekay) May 27, 2015

बिहानै बन्चरो काँधमा हालेर जङ्गल जान्थ्यौ… तिम्ले चिरेका दाउराले आमाले खाना पकाउँथिन्! आमाले मिठो पकाएको देखें तर तिम्रो गुन देखिन बाबा।

— विजय कुमार पाण्डे (@meVeekay) May 27, 2015

रुखका टुप्पामा चढेर डाला काट्थ्यौ, आमाले भुइँमा बसेर बटुल्थिन्.. हाँगो भाँच्चिएर लड्दा तिम्लाइ पनि दुख्दो त हो नि! तर तिम्रो गुन देखिन बाबा।

— विजय कुमार पाण्डे (@meVeekay) May 27, 2015

राति कोही आए भित्र छोडेर तिमी बाहिर जान्थ्यौ… आमाले भित्रभित्रै आफू डराएर हाम्लाइ सान्त्वना दिएजस्तो गर्थिन्! डर त हुँदो हो नि बाबा।

— विजय कुमार पाण्डे (@meVeekay) May 27, 2015

बाबाले कमाएको पैसा झिकेर आमाले चकलेट किन्ने पैसा दिन्थिन्… हामी बाउले भन्दा आमाले माया गर्छिन् भन्थ्यौं! मैले तिम्रो गुन देख्न सकिनँ बाबा।

— विजय कुमार पाण्डे (@meVeekay) May 27, 2015

छोरो नबिग्रोस् भनेर तिमीले झपारी झपारी सही बाटोमा ल्याउँथ्यौ… आमाले त केवल स्वान्त्वना मात्रै दिएकी थिइन! मैले तिम्रो गुन देख्न सकिन बाबा।

— विजय कुमार पाण्डे (@meVeekay) May 27, 2015

आमा त दु:ख पर्दा रुन्थिन्, सारीको सप्कोले आँसु पुछ्थिन्, कपाल जगल्टो पारेर मुख लुकाउँथिन्… तिमीलाइ त समाजले त्यो पनि बन्चित गर्यो बाबा!

— विजय कुमार पाण्डे (@meVeekay) May 27, 2015

सारा समाज पराइ हुँदा आमाको त माइत जाने विकल्प थियो… तिम्रो त त्यो पनि थिएन! तनाव बिसाउन कतै जाउँ भन्ने रहर त तिम्रो पनि हुँदो हो नि बाबा!

— विजय कुमार पाण्डे (@meVeekay) May 27, 2015

तिमीले खर्च जोहो गरिगरि पढायौ… आमाले एकछिन खेल्न जा भन्दा माया देखें, तिम्ले भविष्य बनाउन गरेको मेहनत देख्नसकिन! चित्त दुख्यो होलानि बाबा।

— विजय कुमार पाण्डे (@meVeekay) May 27, 2015

तिम्ले मेहनत गर्ने, घर चलाउने… मैले आमाको दुधको भारा मात्रै देख्ने! “दुध निस्कन र हो नत्र त म पनि खुवाउँथें” भन्ने रहर त हुँदो हो नि बाबा।

— विजय कुमार पाण्डे (@meVeekay) May 27, 2015

तनाव मथ्थर पार्न कहिलेकाहिँ रक्सी खाएर आउँथ्यौ! आमाले “कुक्कुरको झोल खाएर आयो” भन्दै बाँसको चिर्पटले हान्थिन्, तिम्रो व्यथा बुझ्न सकिन बाबा।

— विजय कुमार पाण्डे (@meVeekay) May 27, 2015

आमाले लसुनबारीमा लगेर नुहाइदिँदा जाडो भएर भाग्न खोज्थें… मलाइ पाखुरामा समातेर ढाड भाँचिने गरि कुट्थिन्। तिम्रो मन भक्कानिदो हो नि बाबा! 🙂

— विजय कुमार पाण्डे (@meVeekay) May 27, 2015

पुराना छालाजुत्तामा फाटेका मोजाले काम चलाउँथ्यौ… मोजाकै भएपनि भकुण्डो खेलोस् भनेर ती पनि त्याग गरेउ हगि! तिम्रो व्यथा बल्ल बुझ्दैछु बाबा।

— विजय कुमार पाण्डे (@meVeekay) May 27, 2015

साँझ पर्नासाथ भैंसी दुहुन्थ्यौ, आमाले दुध तताएर तरजति मलाइ खनाइदिन्थिन्… तिमी डालाभरि मकै छोडाउन थाल्थ्यौ, एकछिन पनि आराम गरेनौ है बाबा!

— विजय कुमार पाण्डे (@meVeekay) May 28, 2015

जङ्गलमा बाघ, झाडीमा सर्प, पखेरामा पहिरो! हरेकपल जीवनमरणको सङ्घर्ष चल्थ्यो… आमाले मलाइ एक जन्म दिइन्, तिमीले मलाइ कैयौं मृत्यु जितायौ बाबा।

— विजय कुमार पाण्डे (@meVeekay) May 28, 2015