काठमाडौं । एक जमाना यस्तो थियो, माओवादी केन्द्रका अध्यक्ष पुष्पकमल दाहाल र तत्कालीन माओवादी नेता (हाल नयाँ शक्तिका संयोजक) बाबुराम भट्टराईबीचको सल्लाहविना कुनै निर्णय नै हुँदैनथ्यो ।
प्रचण्डलाई हरेक समस्यामा साथ दिने र बाबुरामलाई त्यसरी नै साथ जुटाउने प्रचण्ड–बाबुरामबीचको सम्बन्ध अहिले सोचेभन्दा फरक छ । अहिले बाबुरामले सके प्रचण्ड सिध्याउने र प्रचण्डले सके बाबुराम सिध्याउने खेलमा उनीहरू लागि परेका छन् ।
बाबुरामले तत्कालीन एमाओवादी परित्याग गरी माओवादीविरुद्ध अभिव्यक्ति दिन थालेपछि त्यसको प्रतिक्रिया स्वरूप प्रचण्डले पनि बाबुराम विरुद्धको अभिव्यक्ति दिन थालेका थिए । तर, पछिल्लो समय बाबुरामले आफ्नो पूर्वसहयात्री प्रचण्डलाई प्रधानमन्त्री बन्नबाट रोक्न प्रयास गरेको खुलेको छ ।
उच्च स्रोतका अनुसार प्रचण्डलाई प्रधानमन्त्री हुन नदिन बाबुरामले अन्तिम समयसम्म प्रयास गरेका थिए । केपी शर्मा ओली नेतृत्वको सरकारबाट माओवादीले समर्थन फिर्ता लिएलगत्तै कांग्रेससँगको समझदारीअनुसार प्रचण्ड प्रधानमन्त्री बन्ने निश्चित भएपछि बाबुरामले भारतीय शीर्ष नेतासँग कुरा गरेका थिए ।
माओवादीमा रहँदा नै भारतसँग राम्रो सम्बन्ध बनाएका बाबुरामले प्रचण्डलाई प्रधानमन्त्री बन्नबाट रोक्न भारतीय प्रधानमन्त्री नरेन्द्र मोदीसम्म समेत विशेष सूत्रमार्फत आग्रह गरेको स्रोतको दाबी छ । माओवादीले समर्थन फिर्ता लिएपछि प्रधानमन्त्री ओलीले संयोजक बाबुरामलाई बोलाएर कुराकानीसमेत गरेका थिए ।
कुराकानीका क्रममा बाबुरामले आफूले सकेसम्म प्रचण्डलाई प्रधानमन्त्री बन्नबाट रोक्ने वचन दिएका थिए ।
स्रोतका अनुसार नेपाली कांग्रेसका नेता रामचन्द्र पौडेललाई प्रधानमन्त्रीका लागि प्रस्ताव गर्ने बाबुरामको योजना थियो । उनको योजनाअनुसार एमालेले पौडेललाई प्रस्ताव गरेका थिए ।
भारतीय अधिकारीले बाबुरामको कुरा नसुनेपछि प्रचण्डलाई रोक्ने बाबुरामको योजना विफल भएको हो । बाबुरामले भारतीय अधिकारीसँग आफूलाई रोक्न कुरा गरेको विषयबारे प्रचण्डलाई समेत जानकारी थियो । बाबुराम सचिवालयले भने बाबुराम प्रचण्डलाई रोक्ने या अरू कसैलाई प्रधानमन्त्री बनाउने दाउमा नरहेको जनायो । – आजको जनप्रहार साप्ताहिकमा खबर छ ।
