जापान – यहि सेप्टेम्बर १८ तारीख आईतबार नयाँ शक्ति पार्टी नेपालका संयोजक एवं पुर्व प्रधानमन्त्री डा. बाबुराम भट्टराई नयाँ शक्ति पार्टीको प्रवासी संगठन अन्तराष्ट्रिय नेपाली समाज जापानले आयोजना गरेको “नेपालको समग्र विकास र समृद्धिको लागि प्रवासी नेपालीहरुको भुमिका तथा आवश्यकता” विषयमा सम्वोधन गर्न जापान पुग्ने भएका छन् ।

अर्थ सरोकार डटकमसँग कुराकानी गर्दै नयाँ शक्ति जापानका अभियनता तथा प्रवास प्रादेशिक समितीका सदस्य भुवन रोकाले देश निर्माणमा नयाँ शक्तिले अवलम्वन गरेका निती तथा कार्यक्रमहरु र त्यसमा विदेशमा बस्ने नेपालीहरुको भुमिकाबारे प्रष्ट पार्न डा. बाबुराम भट्टराई र प्रवास प्रादेशिक समितीका संयोजक नवराज सुवेदी जापान आउने  कार्यक्रम रहेको बताए ।

रोकाको अनुसार १८ तारीकको कार्यक्रम आन्तरिक र खुल्ला गरी दुई चरणमा बिभाजन गरिएको छ । बिहान १० बजेदेखि सुरु हुने आन्तरिक कार्यक्रममा राष्ट्रिय भेलाको भाव सम्प्रेषण तथा प्रशिक्षण कार्यक्रम रहेको र १ बजेबाट हुने खुल्ला कार्यक्रममा “नेपालको समग्र विकास र समृद्धिको लागि प्रवासी नेपालीहरुको भुमिका तथा आवश्यकता” बिषयमा छलफल हुने बताए । साथै उक्त छलफल कार्यक्रममा नेपाली दुतावासका प्रतिनिधिहरु एनआरएनए जापानका प्रतिनिधिहरु, अन्य राजनितीक संघ संगठनका प्रतिनिधिहरु, सामाजिक संस्थाका प्रतिनिधिहरु, व्यवसायी, पत्रकार लगायत जापानबासी नेपालीहरुको ठूलो उपस्थिति रहने रोकाले जानकारी दिए । 

रोकाले दिएको जानकारी अनुसार कार्यक्रम सुगीनामी कु उमेजातो १-२२-३२ सेसन सुगीनामी हल टोकीयो, जापानमा हुनेछ । सम्पूर्ण जापानवासी नेपालीहरुलाई उक्त छलफलमा सहभागी हुनको लाई अपिल गर्दै रोका अगाडी भन्नुहुन्छ “अबको निकास, आर्थिक विकास, सम्भव छ सम्वृद्धि हाम्रै पालामा” भन्ने नारा सहित स्थापना भएको नयाँ शक्ति पार्टीले आर्थिक विकासको लागी अंगालेको निती कार्यक्रम जापान बासी सबै नेपालीहरु सुन्न र बुझ्न आउनुहुन आग्रह गर्दै, हाम्रो पालामा विकास गर्ने नयाँ शक्ति अन्तिम विकल्प भएकोले यो अभियानमा प्रत्यक्ष सहभागी भएर देश बिकासको निम्ति आफु भित्र रहेका रचनात्मक, प्राबिधिक र बौधिक क्षमताको प्रयोग गर्नुहुन पनि सबैमा अनुरोध गरे ।

रोका अगाडी भन्छन्, ‘यस कार्यक्रमले छोटो समयमा नै जापानमा स्थापित भएको नयाँ शक्तिको प्रवासी संगठन अन्तराष्ट्रिय नेपाली समाजमा थप ब्यक्तिहरु आकर्षित हुने कुरा त छदैछ त्यो भन्दा महत्वपूर्ण कुरा जापानमा रहेका नेपाली ब्यवसायीहरु नयाँ शक्तिको योजना अनुरूप नेपालमा लगानी गर्ने संभावना बढ्ने र अन्य जापानबासी नेपालीहरु पनि देश निर्माण अभियानमा जुट्न मद्दत गर्ने कुरामा विश्वस्त रहेका छौ ।