चीन । चाइना एभरग्राण्ड ग्रुपका अध्यक्षले करिब ३४४ मिलियन अमेरिकी डलर उठाउन सो कम्पनीमा भएको आफ्नो सेयरको ठूलो हिस्सा बेचेपछि सोमबार सो कम्पनीको सेयरमा ४.८ प्रतिशतले गिरावट आएको छ । सो ग्रुपको लगानी रहेको चाइना एभरग्राण्ड न्यू इनर्जी भेइकल ग्रुप लिमिटेडको सेयरमा पनि ५ प्रतिशत गिरावट आएको छ । एभरग्राण्ड ग्रुपले सो कम्पनीमा पूँजी भित्राउन विभिन्न लगानीकर्ताहरुसँग उपायको खोजी गरिरहेको बताएसँगै कम्पनीको सेयरमा गिरावट आएको हो ।
३०० मिलियन भन्दा बढी ऋणभारका कारण एभरग्राण्ड ग्रुपलाई आफ्ना कम्पनीहरुको पूँजी वृद्धि गर्न हम्मेहम्मे परिरहेको छ । स्रोतका अनुसार सो ग्रुपका अधिकारीहरुले अध्यक्ष हुइ का यानलाई लगानीकर्ताहरुलाई तिर्न आफ्नो व्यक्तिगत सम्पत्तिको केही हिस्सा प्रयोग गर्न सुझाएका थिए । एभरग्राण्डले गत नोभेम्बर ६ मा ८२.५ मिलियन अमेरिकी डलर बराबरको व्याज रकम तिर्नै सकेन । लगानीकर्ताहरु सो कम्पनीले म्याद सकिन भन्दा ३० दिन अघिसम्म तिर्छ वा तिर्दैन भन्नेबारे अन्योलमा छन् ।
अध्यक्ष हुइले १.२ बिलियन सेयर औसत २.२३ हङकङ डलरमा बेचेको जानकारी कम्पनीले शुक्रबार मात्रै दिएको थियो । यो सँगै हुइको सो कम्पनीमा रहेको सेयर हिस्सा ७७ बाट ६७.९ प्रतिशतमा झरेको छ । बिगत केही महिना यता एभरग्राण्डमा आएको गिरावटले चिनियाँ प्रोपर्टी क्षेत्रमा असर पुगेको छ । फेन्टेसिया होल्डिङले सोमबार सो कम्पनीको सेयर ट्रडिङ रोक्का गरेको छ । कम्पनीले मंगलबार बाँकी रहेको ऋण सम्बन्धमा एक याचिका दायर गरेको जनाएको छ ।
