काठमाडौं । अहिले नेपाली बैंकिङ क्षेत्रमा मर्जरको लहड चलेको छ । पछिल्लो नौ महिनामा मात्रै ८ वटा बैंकहरुबीच ‘बिग मर्जर’ भएको छ । मर्जरको पर्व चलेसँगै बैंकहरु को भन्दा को ठूलो ? भन्ने प्रतिष्पर्धामा होमिएका छन् । एक वर्षअघिसम्ममात्रै २७ वटा रहेका वाणिज्य बैंकहरु मर्जरपछि अहिले २२ वटा भएका छन् । विगतमा नेपालमा ३ सय ३ वटा बैंक रहेको इतिहास पनि हामीमाझ नै छ ।
यसो त पछिल्लो समय नेपाली बैंकिङ क्षेत्रमा को ठूलो ? भन्ने सवालमा विभिन्न बैंकहरुको आ-आफ्नै तर्क छ । सबै बैंकले आ-आफ्नो क्षेत्रमा आफू नै ठूलो हुनुको विभिन्न कारण समेत दिँदै आएका छन् ।
यसै पनि धेरै बैंकहरु मर्जरमा गएपछि बैंकको आकार र सेवा ठूलो हुने नै भयो । तर, केही यस्ता बैंकहरु पनि छन् जुन मर्जर बिना नै बैकिङ क्षेत्रमा अब्बल दर्जामा देखिन्छन् । जसमध्येको एक हो एनआईसी एशिया बैंक । तत्कालीन समयमा बैंक अफ एशियासँग मर्जर पछि
एनआईसी एशिया बैंकले मुलुकभर ३५९ शाखा कार्यालयहरू, ४७३ एटिएम, १०५ वटा विस्तारित काउन्टर एवं ८१ वटा शाखा रहित शाखा सञ्जाल विस्तार गरेको छ । देशको कुल जनसंख्यामध्ये २० वर्षदेखि ५० वर्ष उमेर समूहसम्मको आर्थिक रूपमा सक्रिय जनसंख्याको करिब २५ प्रतिशत जनतामाझ सेवा प्रवाह गर्न सफल भएको बैंकले जनाएको छ ।
