• भुमिदत्त तिवारी/अर्थ सरोकार सुदूरपश्चिम ब्युरो

धनगढी । धनगढी उपमहानगरपालिका वडा नम्बर १४ ले भ्याकेन्सी खाली गराउन सुरु गरेको छ । वडा कार्यालयले वर्षौंदेखि अतिक्रमण गरिएका भ्याकेन्सी हटाउन सुरु गरेको हो ।

वडा कार्यालय र नगरपालिकाको अग्रसरतामा भ्याकेन्सी खाली गराउन सुरु गरेको वडा अध्यक्ष मान बहादुर विष्टले बताए । भ्याकेन्सी हटाउन वडाले सुरु गरिसकेको बताउँदै अध्यक्ष विष्टले आगामी दिनमा थप सशक्त भएर अतिक्रमण भएका जग्गा खाली गराउने प्रतिवद्धता व्यक्त गरेका छन् ।

वि.सं. २०३६ सालमा पुनर्वास कम्पनीले जग्गा वितरणका क्रममा छुट्याएको भ्याकेन्सी स्थानीयले झण्डै ३५ वर्षअघिदेखि अतिक्रमण गरेका थिए । भ्याकेन्सी खाली गराउन यसअघि पटक–पटक पहल गरिए पनि भ्याकेन्सी खाली गराउन सकिएको थिएन । तर, भ्याकेन्सी खाली गराउने कार्यमा वडा कार्यालयले अग्रसरता देखाएसँगै भ्याकेन्सी खाली गराउन थालिएको वडा सदस्य मान बहादुर खत्रीले बताएका छन् ।

वर्षौंदेखि अतिक्रमण गरिएका भ्याकेन्सी नगरपालिका, वडा कार्यालय, नगर प्रहरी, प्रहरी र सशस्त्र प्रहरीको रहोबरमा खाली गराउने कार्य भइरहेको छ ।