काठमाडौं । त्रिभुवन अन्तर्राष्ट्रिय विमानस्थलबाट एक चिनियाँ नागरिक पक्राउ परेका छन् । अवैध रूपमा लुकाईछिपाई बाह्य मुलुकतर्फ लैजान लागेको हजारौँ चिनियाँ युआनसँगै एक चिनियाँ नागरिक पक्राउ परेका हुन् ।

१ सय दरको १ हजार थान गरी जम्मा १ लाख चिनियाँ युआनसहित चिनियाँ नागरिक ५८ वर्षीय होङग होङगलाई बुधबार बिहान प्रहरीले पक्राउ गरिएको हो ।

एयर चाइनाको उडानबाट चीनको छेन्दु जान लागेका उनलाई विमानस्थलको अन्तर्राष्ट्रिय उडानतर्फको प्रस्थान ह्‍याण्ड ब्यागेज चेकिङ एरियामा पक्राउ गरिएको हो । जाँचपासका क्रममा उनको झोलाबाट अवैध रुपमा लैजाँदै गरेको हजारौँ चिनियाँ युआन फेला परेको थियो ।

पक्राउ पछि होङगलाई थप अनुसन्धान एवम् कार्वाहीका लागि राजश्‍व अनुसन्धान विभाग हरिहर भवन पुल्चोक ललितपुर पठाइएको छ ।