काठमाडौँ । नेकपा एमालेका उपाध्यक्ष तथा पूर्वअर्थमन्त्री बिष्णु पौडेलले अगामी आर्थिक वर्षको बजेट देशको आर्थिक अवस्थामा आधारित हुनुपर्ने बताएका छन् । आर्थिक वर्ष २०८१/८२ को बजेटको कार्यादेशबारे छलफलमा बोल्दै पूर्वअर्थमन्त्री पौडेलले देशको वस्तुगत अवस्था र आर्थिक अवस्थामा आधारित बजेट बन्नुपर्ने बताएका हुन् ।

‘यो बजेट मैले बुझ्दाखेरी मूलभूत रुपमा हाम्रो इच्छा र आकांक्षामा आधारित हुन सक्दैन । हाम्रो देशको वस्तुगत अवस्था के छ ? आर्थिक अवस्थाको आधारमा नै बजेट निर्माण गर्ने हो ।’, पौडेलले भने, ‘हाम्रा स्रोत, साधन र सम्भावनाहरु के छन् ? त्यसकै सापेक्षतामा बजेट निर्माण गर्ने हो । व्यक्तिगत चाहनाहरु बजेटमा अट्न सक्दैनन् ।’

त्यस्तै, पूर्वअर्थमन्त्रीसमेत रहेका पौडेलले नयाँ बजेट मुख्यतः सरकारको नीति तथा कार्यक्रममा आधारित भए पनि सोह्रौं पञ्चवर्षीय योजना र दिगो विकासको लक्ष्यलाई सम्बोधन गर्नेगरी बन्नुपर्ने धारणा राखेका छन् ।

‘आगामी आर्थिक वर्षको मुख्य योजना सोह्रौं पञ्चवर्षीय योजना, दिगो विकास लक्ष्य हो ।’, उनले भने, ‘यसका बाबजुद बजेटको मुख्य आधार सरकारको नीति तथा कार्यक्रम नै हो ।’