काठमाडौँ । नेपाल टेलिकमको नाफा ३ प्रतिशतले बढेको छ । कम्पनीले सार्वजनिक गरेको चालु आर्थिक वर्षको तेस्रो त्रैमाससम्मको अपरिस्कृत वित्तीय विवरण अनुसार कम्पनीको नाफा ३.३६ प्रतिशतले बढेको हो । यस अवधिमा कम्पनीले कुल ५ अर्ब ५९ करोड ३७ लाख रुपैयाँ खुद नाफा आर्जन गरेको छ । जबकी गत आर्थिक वर्षको सोही अवधिमा कम्पनीको खुद नाफा ५ अर्ब ४१ करोड रुपैयाँ रहेको थियो । 

यस अवधिमा कम्पनीको आम्दानी भने घटेको छ । समीक्षा अवधिमा कम्पनीको आम्दानी ६.८२ प्रतिशतले घटेर २५ अर्ब ४८ करोड रुपैयाँ कायम भएको छ । 

त्यस्तै, कम्पनीको वित्तीय आम्दानी पनि ८.९० प्रतिशतले घटेको छ । समीक्षा अवधिमा कम्पनीको कुल आम्दानी ६.०३ प्रतिशतले घटेको छ भने कम्पनीको वित्तीय खर्च ६६.८२ प्रतिशतले घटेको छ । 

समीक्षा अवधिमा कम्पनीको नाफासँगै प्रतिसेयर आम्दानी (ईपीएस) पनि बढेको छ । यस अवधिमा कम्पनीका यस्तो आम्दानी १ रुपैयाँ ३५ पैसाले बढेर ४१ रुपैयाँ ४४ पैसा पुगेको छ । चालु आर्थिक वर्षको तेस्रो त्रैमाससम्म कम्पनीको प्रतिसेयर नेटवर्थ भने ५१२ रुपैयाँ ९९ पैसा रहेको छ ।