काठमाडौँ । गृह मन्त्रालयले सार्वजनिक यातायातलाई अपाङ्गमैत्री बनाउन निर्देशन दिएको छ । भौतिक पूर्वाधार तथा यातायात मन्त्रालयलाई पत्राचार गर्दै गृह मन्त्रालयले एक महिनाभित्र सार्वजनिक यातायातलाई अपाङ्गमैत्री बनाउन निर्देशन दिएको हो ।
जेठ १७ गते (बिहीबार) सचिवस्तरीय निर्णय गर्दै गृहले एक महिनाभित्र सार्वजनिक यातायातमा र्याम्प (सिँढी) राखेर अपाङ्ग तथा अशक्तमैत्री बनाउन निर्देशन दिएको हो ।
हाल सार्वजनिक यातायात अपाङ्गमैत्री नभएको र यात्रामा असहज हुने गरेकोले अपाङ्गता भएका व्यक्तिहरुलाई यात्रामा सहज होस् भनी यस्तो निर्देशन दिइएको गृहका सचिव एकनारायण अर्यालले बताएका छन् । ‘परिवार तथा राज्यबाट नै विशेष हेरचाह आवश्यक पर्ने अपाङ्ग र अशक्त भएका व्यक्तिहरुलाई सार्वजनिक यातायातमा सहज होस् भनेर यो निर्णय गरिएको हो ।’, उनले भने ।
अर्यालका अनुसार यसका लागि सम्बन्धित यातायात व्यवसायी सम्बद्ध संघसंस्थाहरुलाई निर्देशनसमेत दिइसकिएको छ । समाज तथा राज्यले समेत विशेष प्राथमिकतामा राख्नुपर्ने भन्दै हरेक क्षेत्रबाट यसैगरी उनीहरुलाई सहज हुने वातावरण सिर्जना गर्दै जानुपर्ने गृह सचिव अर्यालको भनाइ छ ।
