काठमाडौँ । पछिल्लो ११ महिनामा नेपालमा २६ अर्ब बढीका स्मार्ट फोन नेपाल भित्रिएका छन् । चालु आर्थिक वर्ष २०८०/८१ को पछिल्लो ११ महिनामा २६ अर्ब ३३ करोडको कुल १७ लाख १० हजार थान स्मार्ट फोन नेपाल भित्रिएका हुन् ।
चालु आर्थिक वर्षको ११ महिनामा भित्रिएको फोन गत आर्थिक वर्षको भन्दा २ लाख ८२ हजार थान बढी हो ।
भन्सार विभागका अनुसार गतवर्ष सोही अवधिमा १४ लाख २७ हजार स्मार्ट फोन नेपाल भित्रिएका थिए । नेपाल भित्रिएका स्मार्ट फोनहरु औसतमा १५ हजार रुपैयाँभन्दा बढी मूल्यका रहेको भन्सार विभागले जनाएको छ ।
पछिल्ला दिन स्मार्ट फोनहरुको बढ्दो आकर्षण र मागका आधारमा स्मार्ट फोनको आयात बढाउनु परेको मोबाइल व्यवसायीहरुले बताएका छन् ।
यता सरकारले स्मार्ट फोनको अवैध आयातमा कडाइ गरेसँगै वैधानिक मार्गबाट आउने स्मार्ट फोनको संख्या बढेको भन्सार विभागका अधिकारीहरुको भनाई छ । अवैध मोबाइलमा हुने जोखिमका कारण व्यवसायीहरुले पछिल्लो समय वैधानिक रुपमा मोबाइल फोनका आयात गर्ने हुँदा विगतको भन्दा आयातित स्मार्ट फोनको संख्या र भन्सार मूल्य दुवै बढेको विभागले जनाएको छ ।
