काठमाडौँ । काठमाडौँबाट सिक्री लुटपाटमा संलग्न तीनजना पक्राउ परेका छन् । जिल्ला प्रहरी परिसर काठमाडौँको टोलीले सिक्री लुट्ने र किन्ने तीनजनालाई पक्राउ गरेको हो ।
पक्राउ पर्नेमा गोरखा घर भएर हाल कपुरधारा बस्ने ३८ वर्षीया उषा विष्ट, सर्लाही घर भएर हाल काठमाडौँ बस्ने रामहरि खड्का र हरि शंकर चौधरी रहेका छन् ।
प्रहरीका अनुसार पक्राउ परेकी विष्टले बैशाख ३० गते सुन्धाराबाट ट्याक्सीमा सवार कविराज नेपालीले घाँटीमा लगाएको सुनको सिक्री लुटेर भागेकी थिइन् । सिक्री लुटिए लगत्तै नेपालीले दिएको जाहेरीका आधारमा प्रहरी परिसर काठमाडौँको टोलीले विष्टलाई माछापोखरीबाट पक्राउ गरेको हो ।
त्यस्तै, विष्टले लुटेको उक्त सिक्री रामहरि खड्काले हरि शंकर चौधरीलाई बेचेका थिए । यसरी सुन लुटपाटदेखि खरिदबिक्रीसम्मको कनेक्सन देखिएपछि तीनैजनालाई नियन्त्रणमा लिइएको प्रहरीले जनाएको छ । प्रहरीका अनुसार हाल उनीहरुमाथि थप अनुसन्धान भइरहेको छ ।
