काठमाडौँ । गृहमन्त्री एवम् राष्ट्रिय स्वतन्त्र पार्टीका सभापति रवि लामिछानेले आफू र दलका मन्त्रीहरुले तीन महिना सरकारमा बसेर कुनै पनि नराम्रो काम नगरेको बताएका छन् । उनले सरकारमा आफ्नो दल काम गर्नकै लागि गएको उल्लेख गर्दै काम गर्न सक्ने वातावरण नबने सरकारमा बसिरहनुपर्ने आवश्यकता नरहेको बताएका छन् ।
नेपाल समाजवादी पार्टी (नेसपा)को स्थापना दिवस कार्यक्रममा सभापति लामिछानेले सरकारमा बसेर काम गर्न नसके सरकारबाट बाहिरिने बताएका छन् ।
‘यो तीन महिना सरकारमा बसेर हामीले के राम्रो गर्यौँ, मलाई थाहा छैन । तर केही पनि नराम्रो गर्नु भनेको सबैभन्दा राम्रो गर्नु हो ।’, उनले भने, ‘तीन महिना सरकारमा बसेर मेरो दलका मन्त्रीहरुले एउटा पनि नराम्रो काम गरेका छैनन् । कति राम्रो काम गरिन्छ, त्यो हेर्दै जाने कुरा हुन् । सरकारमा बसेर काम गर्न नसके बाहिरिन्छौँ ।’
गृहमन्त्री लामिछानेले व्यवस्थाभित्र तागत भएको तर इमान्दारिपूर्वक काम गर्ने दलको प्रतिबद्धतालाई भुल्न नहुने धारणा राखेका छन् । उनले काम गर्न सक्दासम्म सरकारमा बस्ने र नसक्दा निस्कने प्रष्ट पारे । ‘सकेको काम गर्नकै लागि हामी सरकारमा सहभागी छौँ ।’, उनले भने, ‘नसक्दा वा अनावश्यक कसैको भारी बोक्न पर्यो भने त्यहाँ बसिरहनुपर्ने केही आवश्यकता छैन ।’
