काठमाडौँ । एनएमबि बैंक लिमिटेडले गत आर्थिक वर्षको चौथो त्रैमासको वित्तीय विवरण सार्वजनिक गरेको छ । बैंकले सार्वजनिक गरेको अपरिस्कृत वित्तीय विवरण अनुसार बैंकको नाफासँगै प्रतिसेयर आम्दानी पनि घटेको छ ।
बैंकको खुद नाफा २९.६७ प्रतिशतले घटेर २ अर्ब ३३ करोड रुपैयाँ पुगेको छ । अघिल्लो वर्षको सोहि अवधिमा बैंकले ३ अर्ब ३२ करोड रुपैयाँ खुद नाफा आर्जन गरेको थियो ।
समिक्षा अवधिमा एनएमबिको खराब कर्जासँगै इम्पेयरमेन्ट चार्ज बढेकोले खुद नाफा प्रभावित भएको हो । एक वर्षको अवधिमा खराब कर्जा २.७५ प्रतिशतबाट बढेर ३.२७ प्रतिशत पुगेको छ । त्यस्तैगरी, अघिल्लो वर्ष यसैअवधिमा १ अर्ब ४५ करोड रुपैयाँ रहेको इम्पेयरमेन्ट चार्ज यो वर्ष १ अर्ब ९२ करोड रुपैयाँ पुगेको छ ।
बैंकको सञ्चालन नाफा पनि २५.०१ प्रतिशतले घटेर ३ अर्ब ५० करोड रुपैयाँमा सीमित भएको छ । खुद ब्याज आम्दानी पनि १०.१३ प्रतिशतले घटेर ७ अर्ब ४९ करोड रुपैयाँमा झरेको छ । असार मसान्तसम्म आइपुग्दा वितरणयोग्य नाफा भने २३ करोड ८९ लाख रुपैयाँ रहेको छ ।
यता, बैंकको नाफासँगै प्रतिसेयर आम्दानी पनि घटेको छ । प्रतिसेयर आम्दानी ४ रुपैयाँ ८३ पैसाले घटेर १२ रुपैयाँ ७२ पैसामा सीमित भएको छ । प्रतिसेयर नेटवर्थ १५८ रुपैयाँ २७ पैसा छ । एनएमबिको चुक्ता पुँजी १८ अर्ब ३६ करोड रुपैयाँ छ ।
